გასულ კვირაში ევროპის წამყვანი სარაგბო კლუბები ევროთასების 2020/2021 წლების გათამაშებაში ჩაერთვნენ. პირველ რაუნდში ჩემპიონთა თასზე ოთხმა, ხოლო ჩელენჯ ქაფზე 7-მა ქართველმა ლეგიონერმა ითამაშა.
კოვიდ-პანდემიის კრიზისის ფონზე, დროებითი ცვლილებები ჩემპიონთა თასისა და ჩელენჯ ქაფის წლევანდელ გათამაშებებსაც შეეხო. ჩემპიონთა თასზე 24 კლუბი ორ 12-გუნდა ჯგუფში განაწილდნენ. ისინი ოთხ-ოთხ მატჩს გამართავენ მიმოსვლით (ორი შინ და ორი გარეთ). თითო ჯგუფიდან მეოთხედფინალში ოთხ-ოთხი მოწინავე გუნდი გადის. ჯგუფებში მეხუთე-მერვე ადგილზე გასული გუნდები ჩელენჯ ქაფზე გადაერთვებიან.
„ა“ ჯგუფის პირველ მატჩში ფრანგული ‘ბორდო’ ‘ნორთჰემპტონს’ ინგლისში ეწვია და 16:12 დაამარცხა. ჟირონდელებმა გამარჯვების ლელო 73-ე წუთზე გაიტანეს. მათ რიგებში შეცვლაზე ითამაშა ლექსო ყაულაშვილმა, რომელმაც 6 შეტევით ბურთი ჯამში 15 მეტრით წინ წაწია.
მიმდინარე სეზონში ‘ტულონის’ რიგებში პირველი თამაში ჩაატარა ახალგაზრდა ბურჯმა ლუკა ჭელიძემ. ფრანგებმა ინგლისის ‘სეილ შარქსი’ მიიღეს და 26:14 დაამარცხეს, ჭელიძე კი შეცვლაზე დასკვნითი 20 წუთით შევიდა და სამი ბოჭვის შესრულება მოასწრო.
უელსში ადგილობრივ ‘ნიუპორტ დრაგონსს’ 24:8 სძლია ‘უოსპსმა’ და ოთხი ლელოს გატანისთვის ბონუსიც აიღო. „ბზიკების“ შემადგენლობაში ერთწლიანი შესვენების შემდეგ ითამაშა ზურაბ ჟვანიამ. ის შეცვლაზე 70-ე წუთზე შევიდა, ერთხელ თერნოვერი გაახერხა, ბურთი ერთხელ წაიღო და 10 მეტრი მოიგო.
„ბ“ ჯგუფში ბონუს ქულით, 26:22 დაამარცხა ირლანდიური ‘კონახტი’ პარიზულმა ‘რასინგ 92’-მა. გურამ გოგიჩაშვილი შეცვლაზე 50-ე წუთზე შევიდა და დაცვაში 9 ბოჭვა შეასრულა, ბურთით ხელში კი ორჯერ შეუტია.
ჩელენჯ ქაფზე 14 გუნდი ერთ ჯგუფშია გაერთიანებული და ისინიც პირველ ოთხ ეტაპზე ოთხ-ოთხ მატჩს გამართავენ სხვადასხვა გუნდებთან – ორს შინ და ორს გარეთ. მერვედფინალში რვა მოწინავე გადის და მათ რვა გუნდი ჩემპიონთა თასიდან დაემატება.
პირველ ტურში ‘სტად ფრანსემ’ იტალიურ ‘ბენეტონს’ უმასპინძლა და 20:44 დამარცხდა. პარიზელთა სასტარტო შემადგენლობაში იყო ვასილ კაკოვინი, რომელმაც 7 ბოჭვა შეასრულა და ბურთით 4-ჯერ მიეძალა. 54-ე წუთზე შევიდა შეცვლაზე გიორგი მელიქიძე და 4 ბოჭვასთან ერთად, ბურთით სამჯერ შეუტია.
‘ლესთერ თაიგერსისა’ და ‘ბრივის’ მატჩში მოედანზე ოთხი ქართველი გავიდა – რეფერი ნიკა ამაშუკელი იყო, სამმა მორაგბემ კი სტუმართა შორის ითამაშა. ბადრი ალხაზაშვილი ძირითად შემადგენლობაში იყო და შესვენებისას შეცვალეს, თუმცა 66-ე წუთზე მოედანზე დაბრუნდა. მან ოთხი შეტევით 18 მეტრი მოიგო და 6 ბოჭვა შეასრულა. შესვენებისას შევიდა შეცვლაზე ლუკა ჯაფარიძე (5 ბოჭვა, ბურთით 3-ჯერ შეუტია), ხოლო 56-ე წუთიდან ითამაშა ირაკლი ცხადაძემ და 5 ბოჭვის გაკეთება მოასწრო. ‘ლესთერმა’ ბონუსით, 39:17 მოიგო.
‘ძებრეს’ იტალიაში ეწვია და ფრედ 25:25 ეთამაშა ‘ბეიონი’, რომლის შემადგენლობაში სრულად ითამაშა კოტე მიქაუტაძემ. მან ხუთი შეტევით 5 მეტრით წინ წაიწია და სამი ბოჭვა გააკეთა.
‘პომ’ ინგლისურ ‘ვუსთერს’ დაძაბულ ბრძოლაში ბოლო წუთზე გატანილი ლელო-გარდასახვით 24:20 მოუგო. მასპინძელთა შორის 61-ე წუთიდან ითამაშა ომარ ოდიშვილმა.
ევროთასების მეორე რაუნდის შეხვედრები 18-20 დეკემბერს გაიმართება.
RUGBY.GE
კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია