რუსთავის ‘ხარებმა’ მარნეულის ‘არმაზი’ მეორე ტაიმში დაჯაბნა, 33:10 დამარცხებით ბონუს ქულაც აიღო და მინიმუმ ხვალამდე სატურნირო ცხრილის სათავეში მოექცა.

„შევარდენზე“ გამართულ მატჩში სტუმრებმა სულ 5 ლელო გაიტანეს, აქედან ოთხი მეორე ტაიმში. რუსთაველები შერკინებაში უდიდეს უპირატესობას ფლობდნენ, რაც გადამწყვეტი აღმოჩნდა, მათმა 8 ნომერმა ჟორა მღებრიშვილმა კი დუბლი შეასრულა.

ანგარიში მასპინძლებმა გახსნეს, ტაიმის შუაში გივი ცინცაძემ ჯარიმა გაიტანა. ‘ხარებმა’ ჯარიმების კარში დარტყმაზე უარი თქვეს და მესამე ცდაზე, 33-ე წუთზე, იერიში ლელოთი ნიკა კევლიშვილმა დაასრულა, ხოლო ვაჟა ხუციშვილმა გარდასახა.

მეორე ტაიმი რუსთაველთა იერიშებით დაიწყო და 48-ე წუთზე კარგი შეტევა ირაკლი ჩომახაშვილის ლელოთი დასრულდა. მალევე ‘არმაზი’ საკუთარი ლელოს ხაზთან შეცდა და მერე დაჯარიმდა, ‘ხარებმა’ შერკინება ირჩია, მეტოქეს მიაწვა და მღებრიშვილმა თავისი პირველი ლელო გაიტანა. ხუციშვილს ეს გარდასახვა გაუცუდდა - 3:19.

მე-60 წუთზე მღებრიშვილმა მეტოქის 22-ში დანიშნული შერკინებიდან შეუტია, ის რომ შეაჩერეს ბურთი ხუციშვილმა აიტაცა, ხაზი გაჭრა და თავისივე ლელო გარდასახა. 69-ე წუთზე ‘არმაზმა’ ხელით კარგი შეტევა განახორციელა და გიორგი ნავროზაშვილმა ერთი საპასუხო ლელო გაიტანა, ხოლო საბა ნიკოლავამ გარდასახა, მაგრამ მალევე 5-მეტრიანი შერკინებიდან მრებრიშვილმა დუბლი შეასრულა და ხუციშვილმაც საბოლოო შედეგი დააფიქსირა - 10:33.

‘ხარები’ 24 ქულით პირველ ადგილზეა და ‘აიას’, რომელიც მე-7 ტურში ხვალ ბოლნისის ‘ყოჩებს’ მასპინძლობს, 3 ქულით უსწრებს. ‘არმაზს’ 11 ქულა დარჩა და მე-7 ადგილზეა.

rugby.ge