ფიჯის მორაგბეთა ეროვნულმა ნაკრებმა, რომელიც 2019 წლის მსოფლიო თასზე “ბორჯღალოსანთა” ერთ-ერთი მეტოქეა, წყნარი ოკეანის თასის მიმდინარე გათამაშებაში პირველი გამარჯვება იზეიმა.
შეგახსენებთ, რომ “მფრინავმა ფიჯელებმა” პირველ ტურში კამაიშიში იაპონიასთან 21:34 წააგეს, ამჯერად კი, მშობლიურ სუვაში კანადელებს შანსი არ დაუტოვეს – 38:13.
სტუმრებმა კუნძულელებს წინააღმდეგობა მხოლოდ საწყის ნახევარში გაუწიეს, რომელიც 19:13 დასრულდა, შესვენების შემდეგ კი, ქულა აღარ აუღიათ. ფიჯელებმა ჯამში 6 ლელო დადეს, მატავესიმ კი 4 გარდასახა.
ქართველთა მომავალი მეტოქეები წყნარი ოკეანის თასზე დასკვნით მატჩს, ისევ სუვაში, 10 აგვისტოს ჩაატარებენ, მათი მეტოქე კი მეზობელი სამოა იქნება.
მე-2 ტურში სამოელებს დასანანი მარცხი შეემთხვათ. ისინი სუვაშივე აშშ-ს გაეჯიბრნენ და მაკგინტის ჩუბინობის გამოისობით 10:13 დამარცხდნენ.
ამერიკელთა მგეზავმა გამარჯვების მომტანი ჯარიმა უკვე გაწითლებულ დროზე გაიტანა და საბოლოოდ, ცამეტივე ქულა (ლელო, გარდასახვა, 2 ჯარიმა) თავის ანგარიშზე ჩაიწერა.
ამერიკელი მორაგბეები 10 აგვისტოს სუვაში იაპონიას გაეჯიბრებიან და ტურნირის გამარჯვებულის ვინაობა სწორედ ამ შეხვედრაში გაირკვევა, რადგანაც მოახლოებული მსოფლიოს თასის მასპინძლებს აქტივში ასევე 2 მოგება აქვთ.
გუშინ იაპონიამ ტონგას ძალიან დამაჯერებლად – 41:7 მოუგო და კიდევ ერთხელ დაადასტურა, რომ პირველი დონის გუნდებს ბევრით აღარაფრით ჩამორჩება. აზიელებმა ჰიგაშიოსაკაში გამართულ შეხვედრაში 5 ლელო დადეს, რომლებიც ტამურამ უშეცდომოდ გარდასახა და 2 ჯარიმაც შეაგდო.
თავის მხრივ, ტონგელებს 2 მარცხი მოუგროვდათ (პირველ ტურში სამოასთან 17:25 წააგეს) და 9 აგვისტოს, ფიჯის ქალაქ ლაუტოკაში კანადასთან დაგეგმილ მატჩში ბოლო ადგილისთვის თავის დაღწევას ეცდებიან.

ფიჯი – კანადა 38:13 (19:13)
ლელო: მატა (8), იატო (17), ნაკარავა (29), კოვეკალუ (44), ტუისოვა (49), დოლოკოტო (69) – ლოიდი (35)
გარდასახვა: მატავესი (18, 30, 45, 69) – ო’ლირი (36)
ჯარიმა: ო’ლირი (4, 12)

იაპონია – ტონგა 41:7 (21:0)
ლელო: მაფი (9), აი ვალუ (10), ლაფაელე (30), მაცუშიმა (73), ფუკუოკა (78) – ფიფიტა (56)
გარდასახვა: ტამურა (10, 21, 31, 75, 79) – ტაკულუა (57)
ჯარიმა: ტამურა (47)
სინბინი: მაცუშიმა (3)

აშშ – სამოა 13:10 (10:7)
ლელო: მაკგინტი (19) – ლეიუა (5)
გარდასახვა: მაკგინტი (20) – ალატიმუ (6)
ჯარიმა: მაკგინტი (2, 82) – ტაეფუ (72)