ფრანგული “გრენობლის” 26 წლის ქართველი მორაგბე ბექა გიგაშვილი ტოპ 14-ს ტურის სიმბოლურ ნაკრებში ზედიზედ მეორედ მოხვდა.
გასულ უქმეეებზე გრენობლელები ფრანგული რაგბის ერთ-ერთ გრანდ “კლერმონს” დაუხვდნენ და ფრედ (27:27) ითამაშეს, გიგაშვილი კი მოედანზე 30-ე წუთზე ტრავმირებული დუდუ ქუბრიაშვილის ნაცვლად გამოჩნდა და ოთხ წუთში ლელოს დადება მოახერხა.
შეგახსენებთ, რომ “გრენობლს” საფრანგეთის ჩემპიონატში 14 ქულით მე-11 ადგილი უკავია, მომდევნო მატჩს კი სანაკრებო ბატალიების შემდეგ, 24 ნოემბერს, სტუმრად “რასინგთან” გამართავს.
როგორც უკვე ვიუწყებოდით, გიგაშვილი ნოემბრის ტესტებისთვის “ბორჯღალოსანთა” რიგებშია გამოძახებული და სავარაუდოდ, საქართველოს ეროვნულ გუნდში დებიუტიც ექნება.