როგორც უკვე ვიუწყებოდით, ინგლისური ჩემპიონშიფის ბინადარ “ქორნიშ პაირათსის” ქართველი მორაგბე ნოდარ ჭეიშვილი “ბორჯღალოსანთა” 34-კაციან განაცხადში მოხვდა და ნოემბრის ტესტებისთვის ემზადება.
აღნიშნულ ფაქტს ქართველი მეორეხაზელის კლუბიც გამოეხმაურა და ჭეიშვილს ეროვნულ ნაკრებში გამოძახება მიულოცა. ამასთან, “პაირათსის” ვებგვერდზე ქორნიშელთა მწვრთნელის – ალან ფეივერის კომენტარიც გამოქვეყნდა.
“ნოდარმა სეზონისთვის მზადების ციკლში არაერთ მოსამზადებელ მატჩში მიიღო მონაწილეობა და მისი პროგრესი აშკარაა. ზოგადად, ახალ სისტემებთან შეგუებას დრო სჭირდება, თუმცა მას საქართველოში კარგად წვრთნიან და ასაკის მიუხედავად, საერთაშორისო დონეზე თამაშის გამოცდილებაც გააჩნია. იმედი მაქვს, ინგლისში დაბრუნების შემდეგ, ჭეიშვილი ჩვენს გუნდსაც დიდ დახმარებას გაუწევს”.
შეგახსენებთ, რომ საქართველოს ნაკრები პირველ შეკრებას საფრანგეთში გადის, 10 ნოემბერს იტალიაში დაგეგმილ მატჩამდე რამდენიმე დღით ადრე კი, აპენინებზე ჩავა. ვთქვათ ისიც, რომ “ბორჯღალოსნებს” მომდევნო 2 ტესტ-მატჩი თბილისში ელით: 17 ნოემბერს – სამოასთან, 24-ში კი – ტონგასთან.