თბილისის ‘აკადემიამ’ თანაქალაქელი ‘არმია’ დიდი 10-ის მეხუთე ტურის დასკვნით მატჩში 28:12 დაამარცხა და მიმდინარე სეზონში პირველი გამარჯვება მოიპოვა. „მხატვრებმა“ სამი უპასუხო ლელო გაიტანეს და ბონუსიც ჩაიწერეს.

საწყის 20 წუთში გუნდებმა ორ-ორი ჯარიმა გაიტანეს. 33-ე წუთზე აკადემიელებმა მარჯვენა ფრთიდან შეუტიეს, საბა ილურიძემ რამდენიმე მეტრი ირბინა, შებოჭილმა ბურთი მიშა ახობაძეს ამოუგდო და ანგარიში 11:6 გახდა.

45-ე წუთზე ‘აკადემიამ’ მეორე ლელო გაიტანა, ნოდარ მექერიშვილმა დერეფნის შემდეგ ახლოდან შეუტია, ხოლო დავით მოძღვრიშვილმა გარდასახა. ‘არმია’ გააქტიურდა, 53-ე და 69-ე წუთებზე ბახვა კობახიძემ ჯარიმები გაიტანა. სხვაობა სულ რაღაც 6 ქულა იყო, თუმცა ‘აკადემიამ’ ბურთზე კონტროლის დამყარება მოახერხა და მოძღვრიშვილმა ჯარიმით თავისიანებს გამარჯვება დაუბევა.

უკვე გაწითლებულ დროზე „მხატვრებმა“ ბონუსის აღებაც მოახერხეს. მორკინალების რამდენიმე დარტყმის შემდეგ, ლელოში ირაკლი ლუარსაბიშვილი შევიდა, ხოლო მოძღვრიშვილმა საბოლოო შედეგი დააფიქსირა - 28:12.

www.rugby.ge