დიდი 10-ის მეხუთე ტურის კიდევ ერთი ცენტრალური შეხვედრა ბათუმში, „რაგბი არენაზე“ გაიმართება. ‘ბათუმი’ გორის ‘ჯიქს’ დაუხვდება და ორი წლის წყენისთვის რევანშის აღებას ეცდება.

გორელებმა ბათუმელებს საჩემპიონო რბოლაში ორჯერ „აწყენინეს“: 2016/2017 წლების ფინალში, ‘ჯიქმა’ ‘ბათუმს’ თბილისში 28:22 მოუგო, ხოლო გასული სეზონის გასავარდნ ფინალში 25:19 აჯობა და მეტოქე მედლების გარეშე დატოვა.

მიმდინარე სეზონს გუნდები გადახალისებული შეხვდნენ და ურთიერთსაწინააღმდეგო შედეგები აჩვენეს. მომავალმა მასპინძელმა ‘ბათუმმა’ სამი თამაში მოიგო და ერთი წააგო - თბილისში ‘აკადემიასთან’ ბონუსიც აიღო (46:7), ხოლო ‘ლელო-სარასენსს’ 26:13 სძლია; რუსთავის ‘ხარებს’ ბათუმში გასაღები ვერ მოუძებნა და მეორე ტურში 8:15 დამარცხდა, ხოლო გასულ ტურში პატარძეულის ‘ვეფხვები’ მშრალზე დატოვა და კვლავ ბონუსი ჩაიწერა - 25:0.

‘ჯიქმა’ მხოლოდ ერთი თამაში მოიგო, მეორე ტურში ‘აკადემიასთან’ პირველ ტაიმში 21:6 დაწინაურდა და ამის შემდეგ ანგარიში აღარც შეცვლილა. გორელებს პირველ ტურში ‘არმაზმა’ 38:15, ხოლო მეორეში ‘ხარებმა’ 30:6 აჯობა. ერთი კვირის წინ ‘ჯიქმა’ ‘ლელო-სარასენსს’ უმასპინძლა და 14:16 დამარცხდა.

ერთი კვირის წინანდელ მატჩთან შედარებით, ‘ბათუმის’ შემადგენლობაში ცვლილებებია. პირველ ხაზში როტაციის პრინციპით მიხეილ წიკლაური ბრუნდება. სრულად შეიცვალა მეორე ხაზი, სადაც მიმდინარე სეზონში პირველად ითამაშებს ტრავმა მოშუშებული სანდრო ქოიავა და მას ნუკრი ფერსელიძე შეუწყვილდება. მესამე ხაზში საბა შუბითიძის ნაცვლად ფლანკერი ვანო ფუტკარაძე იქნება. 9 ნომრად ბრუნდება ზურაბ თუთბერიძე, ხაზი კი უცვლელი დარჩა.

‘ჯიქმა’ ‘ლელო-სარასენსთან’ ნაბრძოლი ბირთვი შეინარჩუნა და სასტარტო შემადგენლობაში მხოლოდ ერთი მორაგბე შეცვალა - ტრავმირებული თეიმურაზ ჭიჭინაძის ნაცვლად, ფრთაზე თამაშს ნიკა ბიწაძე იწყებს.

www.rugby.ge