ევროთასების სეზონი დასრულდა და შედეგების შეჯამების დროც დადგა. საქმე საამაყოდ წლეულსაც გვაქვს - ჩელენჯ კაპის ქართველ მფლობელთა რიცხვს კიდევ ერთი დაემატა. ანტონ ფეიქრიშვილის უელსურმა კლუბმა - „კარდიფ ბლუზმა“ ინგლისური „გლოსტერი“ ფინალში 31:30 დაამარცხა და ისტორიაში მეორედ მოიგო ეს ტურნირი. მართალია, ქართველ ბურჯს ფინალურ მატჩში მონაწილეობა არ მიუღია, მაგრამ 9 მატჩიდან 5-ში კი ითამაშა, თანაც 3-ჯერ სასტარტო შემადგენლობაში იყო. შეგახსენებთ, შარშან ამ თასის მფლობელები „სტად ფრანსეს“ შემადგენლობაში გახდნენ ზურაბ ჟვანია და გიორგი მელიქიძე.

ძალიან ახლოს იყო ევროტრიუმფთან ვასილ კაკოვინის „რასინგი“. ჩემპიონთა თასზე პარიზელები 4-ჯერ დაწინაურდნენ ირლანდიურ „ლენსტერთან“ გადამწყვეტ შეხვედრაში, მაგრამ ბოლოს მეტოქის შტურმს ვერ გაუძლეს და 12:15 დამარცხდნენ. კაკოვინმა „რასინგის“ 9 სატურნირო მატჩიდან 7-ში მიიღო მონაწილეობა და 7-ვე შემთხვევაში თამაშში მარქაფიდან ჩაერთო, მათ შორის ფინალშიც.

კონტინენტური ფარის მფლობელები კი, ზედიზედ მეორედ გახდნენ დავით კაჭარავა და მიხეილ გაჩეჩილაძე. მათი „ენისეი“ მიჯრით მეორედ გავიდა ამ ტურნირის ფინალში და თუ შარშან თანაქალაქელი „კრასნი იარი“ დაამარცხა, წლეულს გერმანულ „ჰაიდელბერგს“ მოუგო.

აქვე გთავაზობთ 2017/18 წლების სეზონის ჩემპიონთა თასსა და ჩელენჯ კაპზე ნათამაშები ქართველების ჩამონათვალს თავისი სტატისტიკით.