შაბათ საღამოს "ბრივმა" პარიზში "სტად ფრანსეს" დიდი ომი კი გაუმართა, მაგრამ მაინც დამარცხდა (22:30) და ტოპ 14-ში დარჩენის ბოლო შანსი დაკარგა. საკმაოდ კარგი მორაგბეებით დაკომპლექტებული გუნდის პრო დ2-ში დაქვეითების ამბავმა კი სატრანსფერო ბაზარზე სერიოზული გააქტიურება გამოიწვია.

საფრანგეთის ნაკრების ახალგაზრდა მესამეხაზელმა ფაბიენ სანკონიმ "ბრივთან" კონტრაქტის გახანგრძლივება იუარა, ფრანგმა მგეზავმა ნიკოლა ბეზიმ კონტრაქტი პრო დ2-ში ახალამოსულ "პროვანსთან" უკვე გააფორმა. მათ გარდა "ბრივში" მთელი ჯგუფია ისეთი მოთამაშეებისა, რომელთაც კლუბთან კონტრაქტი ივნისში ეწურებათ და მათ შორის ვასილ ლობჟანიძეცაა.

საქართველოს ნაკრების სასტარტო 9 ნომრის კონკურენტები არიან ფრანგი ფლორიან კაზენავი და პორტუგალიელი სამუელ მარკეში. ამ უკანასკნელმა დღეს განაცხადა, "ბრივთან" კონტრაქტი 2020 წლამდე მაქვს და გუნდს პრო დ2-შიც არ მივატოვებო. კაზენავს კი კონტრაქტი 1 თვეში ეწურება და ჯერჯერობით უცნობია არც კლუბის პოზიცია და არც თავად მორაგბისა. გამოდის, რომ ვასკა დღევანდელი მდგომარეობით "ბრივში" კვლავაც მე-3 ნომერია თავის პოზიციაზე და ამ კლუბში მისი დარჩენის საკითხი მრავალ ნიუანსზეა დამოკიდებული.

ბურჯებს - სოსო ბეკოშვილსა და კარლენ ასიეშვილს "ბრივთან" ხელშეკრულება 2019-ის ივნისში ეწურებათ და საფრანგეთის ერთ-ერთი ყველაზე ავტორიტეტული სარაგბო გამოცემა "მიდი-ოლიმპიკის" მტკიცებით, ასიეშვილი ის მორაგბეა, ვისი ადგილიც პრო დ2-ში არაა და ეჭვგარეშეა, რომ მას მაღალი დონის კლუბებიდან წინადადებები არ მოაკლდებაო.

ისღა დაგვრჩენია, ახალ ცნობებს დაველოდოთ.