ჰოლანდიასთან მატჩის მეორე დღეს, უმცროსი ბორჯღალოსნები პოზნანის (პოლონეთი) მე-5 სკოლას ეწვივნენ და ადგილობრივ ბავშვებს შეხვდნენ.

ეს ღონისძიება პოლონეთის ეროვნული ნაკრების ყოფილი პირველხაზელის, დარეკ გლოგოვსკის თხოვნით გაიმართა, რომელსაც 1993 წელს ბორჯღალოსნების წინააღმდეგ უთამაშია. ახლა ის პოზნანის მე-5 სკოლის სპორტის მასწავლებელია და პარალელურად, ბავშვებს რაგბში ავარჯიშებს.

ქართველთა სტუმრობამ დიდი ინტერესი გამოიწვია - უმცროს ბორჯღალოსნებს 7-12 წლის 100-მდე ბავშვი დახვდა. მათ აინტერესებდათ როგორი ქვეყანაა საქართველო, როდიდან დადიოდნენ რაგბზე ჩვენი ნაკრების წევრები, როგორია მათი ყოველდღიური სავარჯიშო გრაფიკი და ა.შ.

კითხვა-პასუხი დაახლოებით საათნახევარი გაგრძელდა, რის შემდეგაც სტუმრებს პოზნანის რეგიონის შესახებ ფილმი აჩვენეს.

შეხვედრის დასასრულს სტუმრებმა და მასპინძლებმა ფიზკულტურის დარბაზში გადაინაცვლეს და ქართველმა მორაგბეებმა პოლონელ ბავშვებთან ერთად ითამაშეს.

საქართველოს რაგბის კავშირის პრესსამსახური