ქართველი მარჯვენა ბურჯი ვახტანგ ახობაძე სეზონის დასრულებისთანავე “აჟენს” დატოვებს და კარიერას “ბიარიცში” განაგრძობს. აღნიშნულ ინფორმაციას ფრანგული გამოცემა Petitbleu.fr ავრცელებს.

ზემოხსენებული წყაროს თანახმად, მხარეებს შორის შეთანხმება მიღწეულია და 24 წლის პირველხაზელი ბასკური კლუბის წევრი გახდება.

“ბიარიცი”, რომელიც საფრანგეთის 5-გზის ჩემპიონია, ამჟამად პრო დ2-ში თამაშობს, 25 ტურის შემდგომ საპლეიოფო ზონაში იმყოფება და ტოპ 14-ში გადმოსვლის კარგი შანსი აქვს.

ახობაძის ფრანგული კარიერა 2012 წელს დაიწყო: “ალბიში” ჩაირიცხა და ორი სეზონის განმავლობაში მეორე ელიტურ დივიზიონში 4 შეხვედრა ჩაატარა. 2014-2016 წლებში “მასის” ღირსებას იცავდა, სადაც 30 შეხვედრა ითამაშა და 3 ლელო გაიტანა. ვახტანგი “აჟენის” მოთამაშე 2016 წელს გახდა, პირველ სეზონში აკვიტანიური კლუბის კვართი 11-ჯერ მოირგო და პრო დ2-დან ტოპ 14-ში აღზევდა, სადაც მიმდინარე სეზონში 5 შეხვედრა ჩაატარა და 1 ლელო დადო. გარდა ამისა, ახობაძემ ჩელენჯ ქაფზე 5-ჯერ ითამაშა.