ნოემბრის ტესტებზე საქართველოს ეროვნული ნაკრების მომავალ მეტოქეს, ამერიკის შეერთებული შტატების ნაკრებს, სამხრეთაფრიკელი გარი გოლდი ჩაიბარებს, ოღონდ ეს მხოლოდ მომავალი წლის ზაფხულში მოხდება.

გოლდი ამჟამად ინგლისის პრემიერშიპის „ვუსტერს“ ავარჯიშებს და ოკეანის გაღმა მიმდინარე სეზონის დასრულების შემდეგ გაემგზავრება.

„დიდი მადლობა „უორიორსის“ ხელმძღვანელობას გაგებისთვის. ძალიან მსურდა, საერთაშორისო დონეზე მემუშავა, და მათ ამის საშუალება დაუბრკოლებლად მომცეს. შევეცდები, რომ სეზონის ბოლოს კლუბი საუკეთესო მდგომარეობაში დავტოვო“, - განაცხადა სამხრეთაფრიკელმა სპეციალისტმა.

„არწივები“, რომლებიც „ბორჯღალოსნებს“ 25 ნოემბერს თბილისში ეთამაშებიან, ზაფხულიდან უმწვრთნელოდ არიან. აქამდე მისი თავკაცი ჯინ მიჩელი იყო, რომელმაც სუპერ რაგბის „ბულსი“ ჩაიბარა. ვინ იქნება აშშ-ის მწვრთნელი მომავალი წლის ზაფხულამდე, ჯერჯერობით კვლავაც გაურკვეველი რჩება.