ავსტრალიის ნაკრების კაპიტანმა სტივენ მურმა განაცხადა, რომ შემოდგომის ტესტების დასრულების შემდეგ ეროვნულ გუნდს გამოეთხოვება.

„ერთადერთი ადამიანი, ვისი აზრიც მაინტერესებდა, ჩემი მეუღლე კორტნი იყო. მან მკითხა, გაგრძლება ნამდვილად მსურდა თუ არა. ალბათ, კორტნი რომ არა, „ვოლაბებს“ უფრო ადრეც დავემშვიდობებოდი. ცოლის, ნათესავების, ძმაკაცებისა და მეგობრების მხარდაჭერა ფასდაუდებელი იყო და წინსვლაში დიდად მეხმარებოდა. ნაკრებში გამოსვლა ნიშნავს შესაძლებლობების მაქსიმუმზე სტაბილურად თამაშს. მაგრამ წლები მემატება და დღეს არ ვარ დარწმუნებული, რომ მომდევნო ორი სეზონის განმავლობაში იგივე დონეზე დარჩენას შევძლებ. მაიკლ ჩეიკას (ავსსტრალიის ნაკრების მთავარი მწვრთნელი - ს.გ.) 2019 წლის მსოფლიო თასისთვის გუნდი ჯერაც ასაშენებელი აქვს და თუ წასვლა მსურს, სჯობს ეს აღარ გადავდო“, - ასე განმარტა თავისი გადაწყვეტილება 34 წლის კვაჭმა ავსტრალიის რაგბის კავშირის საიტისთვის მიცემულ ინტერვიუში.

სტივენ მურს საოცარი სანაკრებო კარიერა ჰქონდა - 120 მატჩი (8 ლელო) „ვოლაბების“ კვართით. ავსტრალიის ნაკრებში მასზე მეტი კეპი მხოლოდ დიად ჯორჯ გრეგანს აქვს - 139.