საფრანგეთის მეორე ელიტური დივიზიონის, პრო დ2-ის „ორიაკის“ ქართველი მეორეხაზელისთვის, ლევან დათუნაშვილისთვის მიმდინარე სეზონი დასრულდა.

კლუბის ოფიციალური საიტის ცნობით, 34 წლის ქართველი მარტში მხრის ოპერაციას იკეთებს და სეზონის ბოლომდე ვეღარ ითამაშებს. აქამდე მან მიმდინარე სეზონის 15 მატჩში მიიღო მონაწილეობა, ყველა შემთხვევაში სასტარტო შემადგენლობაში იყო და ბოლოს მოედანზე 2017 წლის 27 იანვარს, „ბეზიეს“ წინააღმდეგ ვიხილეთ.

დათუნაშვილის ფრანგული კარიერა „მონლუსონით“ დაიწყო, ორი წლის შემდეგ „ორიაკში“ გადავიდა და ამ გუნდში მე-8 სეზონს ატარებს (2010-11 წლებში „ფიჟაკში“ იყო განათხოვრებული).

საქართველოს ეროვნული ნაკრების კვართი ლევანმა 75 მატჩში მოირგო, 3-ჯერ გუნდს უკაპიტნა და 3 ლელო დაამიწა. მისი სანაკრებო დებიუტი 2004 წელს ესპანეთთან შედგა, ხოლო ბოლოს „ბორჯღალოსნების“ რიგებში დათუნაშვილმა 2015 წლის მსოფლიო თასზე ითამაშა. მას სამ მსოფლიო თასზე აქვს ნათამაშები - 2007, 2011 და 2015 წლებში.