ფრანგული „ტულონის“ უელსელმა ვარსკვლავმა ლი ჰაფპენიმ სამშობლოდან სარფიანი წინადადება მიიღო.

28 წლის მორაგბე „ტულონში“ სამი წლის წინ „კარდიფ ბლუზიდან“ გადავიდა. ახლა უელსის რაგბის კავშირს მისი სამშობლოში დაბრუნება სურს და მზადაა, ორმაგი ხელშეკრულება გაუფორმოს - ნაკრებისთვის და პროვინციის გუნდისთვის. ამასთან, პრო 12-ში მოთამაშე პროვინციულ კლუბს ჰაფპენი საკუთარი გემოვნების მიხედვით აირჩევს. ხელფასის 60%-ს ლი უელსის რაგბის კავშირისგან მიიღებს, ხოლო 40%-ს - კლუბისგან.

„ვიმედოვნებ, რომ ლი სამშობლოში დაბრუნების გადაწყვეტილებას მიიღებს, თუმცა არჩევანი მისი გასაკეთებელია და მას ნებისმიერ შემთხვევაში პატივისცემით მივიღებთ. კარგად მესმის, რომ მსგავსი გადაწყვეტილების მიღება იოლი არავისთვის იქნებოდა. ჩვენი მხრივ, შესაძლებლობების ფარგლებში, ჰაფპენის საუკეთესო წინადადებით მივმართეთ. თუ ლიმ საფრანგეთში დარჩენა გადაწყვიტა, ის ეროვნული ნაკრების ღირსებას მაინც დაიცავს“, - ამბობს უელსის რაგბის კავშირის თავკაცი მარტინ ფილიპსი.

ჰაფპენის ანგარიშზე 66 სანაკრებო კეპი და 557 ქულაა.