“კარდიფ ბლუზის” ქართველმა ბურჯმა ანტონ ფეიქრიშვილმა 6-კვირიანი დისკვალიფიკაცია მიიღო. როგორც ირკვევა, 29 წლის პირველხაზელმა ეს სასჯელი მეტოქის კბენისთვის მიიღო.

შეგახსენებთ, ფეიქრიშვილს უელსურ კლუბთან მოკლევადიანი კონტრაქტი აკავშირებს. ის კარდიფში ირლანდიური “ოლსტერიდან” გადავიდა, სადაც ასევე მოკლევადიანი ხელშეკრულება ჰქონდა გაფორმებული, მაგრამ თამაშმა არა და არ მოუწია.

რაც შეეხება დისკვალიფიკაციას, ეს ერთობ უცნაური საქციელი ანტონმა თავის მეორე მატჩში ჩაიდინა – 18 ნომებერს, როცა მისი გუნდი ინგლისურ-უელსური თასის მატჩში “ოსპრეიზთან” დამარცხდა. ფეიქრიშვილმა ერთ-ერთი შერკინებისას მეტოქე გუნდის მესამეხაზელ რობ მაკკასკერს უკბინა და რეფერიმ ამისთვის წითელი ბარათი აუფრიალა.

ჰოდა, ეს მკაცრი სანქცია – 6-კვირიანი უქმობა, ქართველ ბურჯს 22 ნოემბრიდან აუმოქმედეს – ასე ვთქვათ, გასული თარიღით. ეს ნიშნავს, რომ ანტონს 2 იანვრამდე ეკრძალება რაგბის თამაში.

სხვათა შორის, სადისციპლინო კომისიამ “სკარლეტსის” მესამეხაზელი ჯეკ კონდიც დასაჯა დისკვალიფიკაციით – იმავ საღამოს, როცა ფეიქრიშვილმა მაკკასკერს უკბინა, კონდიმ ნიუპორტელ ვიზავის პანღური ამოარტყა...