რუსეთის პრემიერ-ლიგის რეგულარული გათამაშების დასკვნით მატჩში, ქვეყნის მოქმედმა ჩემპიონმა, ლაშა მალაღურაძის, ვალერი ცნობილაძისა და მიხეილ წიკლაურის „კრასნი იარმა“ „ყუბანი“ 26:16 დაამარცხა და მეორე ადგილი პრაქტიკულად დაიბევა.

სამივე ქართველი ლეგიონერი სასტარტო შემადგენლობაში იყო, მალაღურაძემ შუამარბის პოზიციაზე სრულად ითამაშა, ხოლო კვაჭი ცნობილაძე და ბურჯი წიკლაური მეორე ტაიმში შეცვალეს. კრასნოიარსკელებმა საწყის ნახევარ საათში სამი ლელო დადეს, მესამე ცნობილაძის ანგარიშზეა, რომელმაც 5 ქულით დერეფნიდან აგორებული მოლი დაასრულა. მალაღურაძემ ორი გარდასახვა გამოიყენა - 19:3.

„ყუბანმა“ პირველი ტაიმის მიწურულს და მეორეს დასაწყისში ორი ჯარიმა გაიტანა, ორი დარტყმა ხელსაყრელი პოზიციიდან გაცუდდა, ხოლო 62-ე წუთზე ლელო დადო და სხვაობა 3 ქულამდე დავიდა. „იარმა“ ბოლო წუთზე მეოთხე ლელო მიითვალა, მალაღურაძემ გარდასახა და პრემიალური ქულაც ჩაიწერა. ახლა ის დარჩენილი ორი თამაშის შედეგს დაელოდება და პლეი ოფში მისი მეტოქის ვინაობაც გაირკვევა.

ზურა ქსოვრელი