ავსტრალიის ნაკრების მთავარმა მწვრთნელმა მაიკლ ჩეიკამ, „რაგბი ჩემპიონშიპის“ მეორე ტურში ახალ ზელანდიასთან ველინგტონში გასამართი მატჩისთვის მგეზავის პოზიცია ქუადე კუპერს ანდო.

იყო ვარაუდი, რომ გასულ შაბათს იმავე „ოლ ბლექსთან“ მატჩში დაშავებული შუამარბების - მეთ გიტოს, მეთ ტოომუასა და რობ ჰორნის ნაცვლად, ცენტრში სწორედ კუპერი დადგებოდა, თუმცა ჩეიკამ სხვაგვარად გადაწყვიტა. ის გუნდს ორი მგეზავით ათამაშებს და 12-ნომრიან მაისურს, პირველად სანაკრებო კარიერაში, ბერნარდ ფოლი მოირგებს. ამრიგად, ნახევარდაცვის ხაზში გენიასა და კუპერის წყვილი აღდგება.

პირველ ტურში 8:42 მარცხის შემდეგ, ავსტრალიის ნაკრების შემადგენლობაში ბევრი ცვლილება იყო მოსალოდნელი და კუპერის გამოჩენაც ერთადერთი სიახლე არაა. დერეფანში ცუდი თამაშის შემდეგ, მხტომელის პოზიციაზე ადამ კოლემანი დადგება, რობ სიმონსი განაცხადშიც არაა. მესამე ხაზში მაიკლ ჰუპერსა და დევიდ პოქოქს სკოტ ფარდი შეუერთდება. შეცვლილია მეორე შუამარბიც და სასტარტოში ტევიტა კურიდრანის ნაცვლად სამუ კერევის ვიხილავთ.

თამაში შაბათს, 27 აგვისტოს თბილისის დროით 11:35 საათზე იწყება.

ავსტრალია: 15. იზრაელ ფოლაუ, 14. ადამ ეშლი-კუპერი, 13. სამუ კერევი, 12. ბერნარდ ფოლი, 11. დეინ ჰეილეტ-პეტი, 10. ქუეიდ კუპერი, 9. უილ გენია; 1. სკოტ სიო, 2. სტივენ მური, 3. სეკოპე კეპუ, 4. კეინ დუგლასი, 5. ადამ კოლემანი, 6. სკოტ ფარდი, 7. მაიკლ ჰუპერი, 8. დევიდ პოქოქი.

სათადარიგოები: 16. ტატაფუ პოლოტა-ნაუ, 17. ჯეიმს სლიპერი, 18. ალან ალაალატოა, 19. დინ მამი, 20. უილ სკელტონი, 21. ტევიტა კურიდრანი, 22. რის ჰოჯი, 23. ნიკ ფიფსი.

ზურა ქსოვრელი