„რაგბი ჩემპიონშიპის“ პირველ მატჩამდე ერთი დღით ადრე, მსოფლიოს ჩემპიონ ახალ ზელანდიას საკადრო პრობლემები შეექმნა.

მას შემდეგ, რაც გუნდის მთავარმა მწვრთნელმა სტივ ჰანსენმა 23-კაციანი განაცხადი ჩამოწერა, ვარჯიშისას „ოლ ბლექსის“ კვაჭი ნათან ჰარისი დაშავდა. მან მუხლი დაიზიანა და შაბათს სიდნეიში, ავსტრალიის ნაკრების წინააღმდეგ ვეღარ ითამაშებს.

შედეგად, სასტარტო 15-ეულში მარქაფიდან დაწინაურდა კოდი ტეილორი, ხოლო სათადარიგოთა სკამზე მის ადგილს დენ კოულსი დაიკავებს, რომელსაც თავის მხრივ ნეკნი აწუხებს.

ავსტრალიისა და ახალი ზელანდიის ნაკრებების შეხვედრა ხვალ, თბილისის დროით 14 საათზე დაიწყება.

ზურა ქსოვრელი