ამერიკის ნაკრებმა რუსეთს საკრამენტოში გამართულ ტესტ-მატჩში მხოლოდ ერთი ლელო დაუდო, რასაც მაკგინტმა გარდასახვით და 6 ჯარიმით 20 ქულა შემატა და სოლიდური სხვაობით დაამარცხა - 25:0.

2004 წლიდან დღემდე, ეს გუნდები მეშვიდედ შეხვდნენ ერთმანეთს და ყველა ჯერზე გამარჯვება „არწივებს“ დარჩათ. ტოდ კლევერი, რომელიც ნაკრების კვართით სარეკორდო, 68-ე შეხვედრას ატარებდა, შთამბეჭდავი იყო. ჯონ მიტჩელის შეგირდები ტერიტორიულ უპირატესობას პირველივე წუთებიდან დაეუფლნენ და 15 წუთში ორი ჯარიმით დაწინაურდნენ. მერე აშშ-მ რუსეთის შეტევის რამდენიმე მცდელობა მოიგერია და შესვენებამდე კიდევ სამი ჯარიმა გაიტანა - 15:0.

მეორე ტაიმის დასაწყისში მაკგინტიმ მორიგი 3 ქულა აიღო და ამის შემდეგ ლელოზე ათამაშდა. შეცვლაზე შესულმა მორაგბეებმა მასპინძელთა შეტევებს მეტი სისხარტე შემატეს და ერთადერთი ლელოც 64-ე წუთზე მიკ ტეომ გაიტანა, ხოლო მაკგინტმა გარდასახა და საბოლოო შედეგი დააფიქსირა - 25:0.

ზურა ქსოვრელი