სამხრეთაფრიკული „ლაიონსის“ მესამეხაზელი იაკო კრილი სუპერ რაგბის წლევანდელი სეზონის დასრულების შემდეგ, იაპონიის ტოპ ლიგის კლუბ „კუბოტა სპეარსს“ შეუერთება.

26 წლის კრილი იაპონელებთან ორწლიან კონტრაქტს გააფორმებს. ამ დროის განმავლობაში იგი „ქარი ქაფზე“ ( სამხრეთ აფრიკის ჩემპიონატი) მონაწილეობას ვერ მიიღებს, თუმცა სამხრეთ აფრიკის ნაკრების რიგებში თამაშს შეძლებს, თუ რა თქმა უნდა, „სპრინგბოქსის“ სამწვრთნელო შტაბმა მისცა ამის შანსი.

კრილის აზრით, იაპონიაში მიღებული გამოცდილება მას დაეხმარება „ლაიონსს“ უფრო ძლიერი დაუბრუნდეს.

„ერთი სული მაქვს როდის შევუდგები საქმეს ტოპ ლიგაში. მინდა „ლაიონსში“ დაბრუნების შემდეგ, მიღებული გამოცდილება თანაგუნდელებს გავუზიარო. „კუბოტა სპეარსსმა“ ამ სეზონში მორაგბეებისა და მწვრთნელების კარგი კონტიგენტი შეკრიბა, მათთან თანამაშრომბლობა ძალიან საინტერესო უნდა იყოს“ - აცხადებს იაკო კრილი.

აღსანიშნავია, რომ კრილის მსგავსად ბოლო წლებში სუპერ რაგბიდან იაპონურ ლიგაში ბევრი მორაგბე გადაბარგდა, მაგალითად სულ რამდენიმე დღის წინ გახდა ცნობილი, რომ ავსტრალიის ნაკრების ვარსკვლავი დევიდ პოქოქი იაპონიის ჩემპიონ „პანასონიკ ვაილდ ნაითსში“ გააგრძელებს კარიერას.

უჩა გოგიძე