საქართველოს მორაგბეთა ეროვნული ნაკრების კვაჭმა ჯაბა ბრეგვაძემ, რომელიც ინგლისის “ვუსტერ ვორიორსში” ორი კვირის წინ გადავიდა, პრემიერშიპში თავისი პირველი თამაში ჩაატარა.

ახალ გუნდში და ახალ ლიგაში, 28 წლის ქართველის დებიუტი წარმატებული გამოდგა. “ვორიორსმა” კერკეტ “ნიუკასლს” უმასპინძლა და დაძაბულ ბრძოლაში 28:20 დაამარცხა. თამაშის მსვლელობიდან გამომდინარე, ბრეგვაძეს უმეტესად დაცვაში მოუწია თამაში. ის შეცვლაზე 64-ე წუთიდან შევიდა და მას შემდეგ ანგარიში აღარ შეცვლილა. სასტარტო შემადგენლობაში იყო და 45 წუთი ითამაშა ქართველმა ბურჯმა რაფავამ, რომელსაც ინგლისური პასპორტი აქვს.

მასპინძლები პირველ ტაიმში უპირატესობას ფლობდნენ და 4 ლელო გაიტანეს. ისინი ერთი პერიოდი 28:10 დაწინაურდნენ, მაგრამ ზედ შესვენების წინ მეორე ლელო გაუშვეს. მეორე ტაიმი სტუმრების იყო, რომლებმაც ჯარიმით ჩამორჩენა მალევე შეამცირეს, დარჩენილ 30 წუთში ანგარიში არ შეცვლილა და “ვორიორსმა” 28:20 იმარჯვა.

ეს მისი მეორე მოგება იყო მიმდინარე სეზონში და 10 ქულით მე-6 ადგილზეა. ახლა გუნდი ევროპის ჩელენჯ ქაფზე გადაერთვება, სადაც 14 ნოემბერს ლექსო ყაულაშვილის ფრანგულ “ლა როშელს” უმასპინძლებს, 21 ნოემბერს იტალიაში “ძებრეს” ეწვევა და პრემიერშიპს 28 ნოემბერს, “სარასენსთან” მატჩით დაუბრუნდება.