ბორჯღალოსნები

19:20 | 20.11.2020 | ნანახია 942 - ჯერ

მერაბ შარიქაძე: "ურთულესი შეხვედრა გველის და მოწოდების სიმაღლეზე უნდა ვიყოთ"

ბორჯღალოსნების კაპიტანმა მერაბ შარიქაძემ, „შემოდგომის ერთა თასის“ მეორე მატჩის წინ ონლაინ-პრესკონფერენცია გამართა და ჟურნალისტების კითხვებს უპასუხა.

21 ნოემბერს საქართველო ჩვენი დროით 21:15 საათზე უელსს ჰლანეჰლიში, „პარკ ი სკარლეთსზე“ ეთამაშება.

უელსს ბოლო ექვსი თამაში წაგებული აქვს და მთავარმა მწვრთნელმა უეინ პივაკმა ირლანდიასთან 9:32 წაგების შემდეგ, სასტარტო შემადგენლობის ერთბაშად 13 მორაგბე შეცვალა. შარიქაძე ამბობს, რომ ეს ფაქტები მოცემულობას არ ცვლის:

„მიუხედავად იმისა, რომ ბოლო ექვსი თამაში წააგო, ვეთამაშებით მსოფლიოში ერთ-ერთ უძლიერეს გუნდს. მათთვის ეს თამაში მნიშვნელოვანია, რადგან იციან, რომ მოგება შეუძლიათ. შემადგენლობაში ახალგაზრდა ბიჭები დააყენეს, რომლებიც დარწმუნებული ვარ ძალიან მოტივირებულები იქნებიან და ეცდებიან წაგებათა სერია გარდატეხონ. ურთულესი შეხვედრა გველის და მოწოდების სიმაღლეზე უნდა ვიყოთ“.

„უელსის ნაკრების შემადგენლობაში ბევრი ცვლილებაა. შესაძლოა ამ ბიჭებს საერთაშორისო თამაშების დიდი გამოცდილება არ აქვთ, მაგრამ არიან ხარისხიანი მოთამაშეები, თავიანთი კლუბების ლიდერები და ამომავალი ვარსკვლავები. ჩვენთვის სურათი დიდად არ იცვლება, რადგან ფოკუსირება ჩვენს თავზე უნდა მოვახდინოთ“.

„თვიქენჰემზე“ თამაშის შემდეგ, ბორჯღალოსნები ინგლისში დარჩნენ და უელსთან მატჩისთვის იქ მოემზადნენ, ჰლანეჰლიში კი გუშინ ჩავიდნენ. შეხვედრამდე 48 საათით ადრე შემადგენლობა დაასახელა ლევან მაისაშვილმაც და არჩევანი გამოცდილ მორაგბეებზე შეაჩერა:

„დრო მაქსიმალურად გამოვიყენეთ და ვეცადეთ სათამაშო მონახაზში ის ცვლილებები შეგვეტანა, რისი სურვილიც გვქონდა. სასიხარულოა, რომ დაგვიბრუნდა კოტე მიქაუტაძე. შემადგენლობაშია ყველა ის გამოცდილი მოთამაშე, რომელიც ხელმისაწვდომი იყო. იმედია ამ გამოცდილებას და ორი მატჩის სათამაშო პრაქტიკას ეფექტურად გამოვიყენებთ და უელსთან დასამახსოვრებელ თამაშს ჩავატარებთ“.

დღეს ბორჯღალოსნებს „პარკ ი სკარლეთსზე“ კაპიტნის ვარჯიში აქვს, დროის უმეტეს ნაწილს კი დასვენებას დაუთმობს. ამ წუთას უელსში ძლიერი ქარი და წვიმაა, რამაც შესაძლოა ხვალინდელ მატჩზე გავლენა იქონიოს:

„განვლილმა ორმა თამაშმა ბევრი რამ გვასწავლა, თუმცა მნიშვნელოვანია, რომ მუდამ ფორმაში იყო და ყველა თამაშში იღებდე მსგავს წნეხს. ინგლისთან ხელით უკეთ ვითამაშეთ და გვაქვს იმედი, რომ გაუმჯობესება ახლაც გვექნება. ბევრი რამ იქნება დამოკიდებული ამინდზე“.

ცნობილია, რომ ფიჯის კორონა-ვირუსის გამო უკვე ორი მატჩი გადაედო და შესაძლოა ტურნირზე მეოთხე შეხვედრის გამართვა ჩვენც არ მოგვიწიოს, თუმცა ბორჯღალოსნები ამაზე ჯერ არ ფიქრობენ:

„წინ მნიშვნელოვანი თამაშები გვაქვს და მეოთხე შეხვედრაზე ჯერ არ ვფიქრობთ“ – ამბობს შარიქაძე.

rugby.ge


კომენტარები (0)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
0.102835