დღეს დილით ბორჯღალოსნებმა, რომლებიც 7 მარტს პარიზში პორტუგალიასთან გასამართი მატჩისთვის ემზადებიან, „სტად ჟან ბუენზე“ ბოლო, კაპიტნის ვარჯიში გამართეს.

23-კაციან განაცხადთან დაკავშირებით გუნდის მთავარი მწვრთნელი ლევან მაისაშვილი ამბობს:

„გვყავს გაფართოებული შემადგენლობა, სადაც არიან როგორც გამოცდილი, ასევე შედარებით გამოუცდელი მორაგბეები. გვყავს ახალგაზრდა მორაგბეებიც, რომელთაც როგორც ეროვნულში, ასევე ახალგაზრდულ ნაკრებებში, საკმაოდ გამოცდილება დაუგროვდათ. ჩვენ გუნდს არ ვყოფთ ასაკის, ან გამოცდილების მიხედვით და ვცდილობთ ყველა თამაშის წინ დავაბალანსოთ შემადგენლობა, მივცეთ მორაგბეებს სათამაშო დრო. სასტარტო შემადგენლობაში და სათადარიგოთა სკამზე ახალგაზრდა მოთამაშეებიც გვყავს და გვსურს ისინი სხვადასხვა პოზიციიდან დავინახოთ. მაგალითად, ვიცით რა შეუძლია თაფლაძეს ცენტრში და გვსურს ის ფრთაზეც გამოვცადოთ. ჩვენთვის მნიშვნელოვანია ხაზის მოთამაშეები რამდენიმე პოზიციას ფარავდნენ. პროცესი ეხება არა მხოლოდ რაგბი ევროპის ჩემპიონატს და გვსურს ვიცოდეთ რა დროს რისი გაკეთების საშუალება გვექნება“.

პორტუგალიის წინააღმდეგ ბორჯღალოსნების რიგებში ორ მოთამაშეს დებიუტი ექნება – მესამეხაზელ თორნიკე ჯალაღონიას და ხაზის მოთამაშე, 20-წლამდელთა ნაკრების წევრ ლაშა ლომიძეს:

„ორივე ძალიან კარგი უნარ-ჩვევებით აღჭურვილი მორაგბეა. მათ გამოვლილი აქვთ ასაკობრივი ნაკრებები და კარგად ესმით რაგბი. ჯალაღონიას მესამე ხაზში ნებისმიერი პოზიციის დაფარვა შეუძლია. ლომიძის ძირითადი პოზიცია ცენტრია, თუმცა შეუძლია 10 და 15 ნომრებზე თამაში. ლაშას, ისევე როგორც დემე თაფლაძეს, წინ აქვთ 20-წლამდელთა ჩემპიონატი და მნიშვნელოვანია მიიღონ კაცთა გუნდების წინააღმდეგ თამაშის გამოცდილება, რაც მათ შემდგომში აუცილებლად წაადგებათ. მათი მუშაობით კმაყოფილი ვარ, რადგან მოკლე ვადაში კარგად აუღეს ალღო სათამაშო სისტემებს“.

ბორჯღალოსნები პორტუგალიასთან მატჩის წინ ორშაბათს, საფრანგეთში შეიკრიბნენ და ‘რასინგ 92’-ის ბაზაზე, ხელოვნურსაფარიან მოედანზე ემზადებოდნენ. მაისაშვილი მზადების პროცესით კმაყოფილია:

„ეს პერიოდი მაქსიმალურად კარგად გამოვიყენეთ. გვქონდა ორი ძირითადი ვარჯიში სამშაბათსა და ხუთშაბათს, ოთხშაბათს კი ბიჭები დავასვენეთ. დღეს კაპიტნის ვარჯიში გვქონდა და ვნახეთ, რომ „სტად ჟან ბუენის“ მოედნის საფარი უფრო მყარია, ვიდრე ‘რასინგის’ ბაზის ხელოვნურსაფარიანი მოედანი. კარგად ვართ მომზადებული და იმედს ვიტოვებ, რომ რაც დაგეგმილი გვაქვს, იმას კარგად შევასრულებთ“.

შეხვედრა საქართველოს დროით 19 საათზე დაიწყება გამარჯვების შემთხვევაში, ბორჯღალოსნები ნაადრევად გახდებიან 2020 წლის რაგბი ევროპის ჩემპიონატის გამარჯვებული.

რაგბი ევროპის ჩემპიონატი 2020. IV ტური. 7 მარტი

პარიზი (საფრანგეთი). სტად ჟან ბუენი. 19 საათი (საქ. დრო)

პორტუგალია – საქართველო

საქართველო

ხაზი: 15. სოსო მათიაშვილი (ლელო-სარასენს), 14. დემე თაფლაძე (ლელო-სარასენს), 13. დავით კაჭარავა (ენისეი), 12. ლაშა მალაღურაძე (ვევეა), 11. ალექსანდრე თოდუა (ბათუმი), 10. ლაშა ხმალაძე (ბათუმი), 9. გიორგი ბეგაძე (ჯიქი);

შერკინება: 1. გიორგი თეთრაშვილი (აჟენი), 2. შალვა მამუკაშვილი (ყოჩები), 3. ლევან ჩილაჩავა (მონპელიე), 4. ლაშა ჯაიანი (ექსეთერის უნივერსიტეტი), 5. დავით გიგაური (კოლომიე), 6. ბექა საღინაძე (ორიაკი), 7. გიორგი თხილაიშვილი (ბათუმი), 8. ბექა გორგაძე (ბორდო, კაპ.).

მარქაფა: 16. გიორგი ჭყოიძე (ლოკომოტივი პენზა), 17. გურამ გოგიჩაშვილი (რასინგ 92), 18. გიორგი მელიქიძე (სტად ფრანსე); 19. შალვა სუთიაშვილი (ანგულემ), 20. თორნიკე ჯალაღონია (ბიარიცი); 21. გელა აფრასიძე (მონპელიე), 22. თედო აბჟანდაძე (ბრივი), 23. ლაშა ლომიძე (აია).

rugby.ge