შიდა რაგბი

15:13 | 16.02.2020 | ნანახია 532 - ჯერ

დიდი 10 | "ბათუმი" 26:10 "აკადემია"

ქვეყნის ჩემპიონმა და მიმდინარე გათამაშების ლიდერმა ‘ბათუმმა’, დიდი 10-ის მე-12 ტურის მატჩში თბილისის ‘აკადემიას’ მეორე ტაიმში პირწმინდად აჯობა, ჯამში ერთის წილ 4 ლელო გაუტანა და 2020 წელი გამარჯვებით დაიწყო.

თამაში სტუმართა შეტევებით დაიწყო და ისინი მე-10 წუთზე დაწინაურდნენ. დავით მოძღვრიშვილს ორი ჯარიმა გაუცუდდა, მერე კი ბათუმელმა მცველებმა ფეხით გადაკიდებული ბურთი საკუთარ 22-ში ვერ აიღეს, ის გიორგი მიქანაძემ აიტაცა და ლელო მოძღვრიშვილმა გარდასახა. ტაიმის ბოლოს მასპინძლებმა მოახერხეს მეტოქის წნეხში მოქცევა, 5-მეტრიანი დერეფნის შემდეგ მოლი დააყენეს და ვაჟა თაგაურმა ლელო გაქვითა, თუმცა გარდასახვა არაზუსტი იყო.

‘აკადემიამ’ მეორე ტაიმის მე-11 წუთზე მოძღვრიშვილის მიერ გატანილი ჯარიმით უპირატესობა გაზარდა, მაგრამ ამის შემდეგ ‘ბათუმმა’ თამაშის მსვლელობა საბოლოოდ გარდატეხა, სამი ლელო გაიტანა და 26:10 მოგებით, ბონუსიც ჩაიწერა.

ზღვისპირელები 57-ე წუთზე დაწინაურდნენ. მათ თამაში ააჩქარეს, ყველა ჯერზე შეძლეს უპირატესობის ხაზის გადალახვა, დაცვა აირია და მარჯვენა ალამთან ლელო გიორგი გოგიტიძემ გაიტანა, ხოლო ბექა ურჯუკაშვილმა გარდასახა – 12:10.

64-ე წუთზე ბათუმელებმა კიდევ ერთი თანმიმდევრული შეტევა განახორციელეს, მცველებმა გადაწყობა ვეღარ მოასწრეს და ვანო ფუტკარაძის ლელო ურჯუკაშვილმა გარდასახა. გავიდა 5 წუთი და ლელო უკვე კობა ჯიმშელეიშვილმა გაიტანა. ლაშა ხმალაძემ ხაზი გაჭრა და ორი ოფლოუდის შემდეგ მიზანს ჯიმშელეიშვილმა უწია, ხოლო ურჯუკაშვილმა გარდასახვით საბოლოო შედეგი დააფიქსირა.

rugby.ge


კომენტარები (0)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
0.094804