საქართველოს ნაკრების მორაგბე ოთარ გიორგაძე ფრანგულ „ბრივში“ რჩება და გუნდთან ახალი კონტრაქტი გააფორმა. როგორც ტოპ 14-ის ბინადარი კლუბის ვებგვერდი იტყობინება, გიორგაძემ ხელშეკრულება 2022 წლის ზაფხულამდე გაახანგრძლივა.

„ოთარი გასული სეზონის დასაწყისში შემოგვიერთდა და ძირითადი შემადგენლობის წევრი სწრაფადვე გახდა, მისი ძალა მოედანზე დაამტკიცა. ჩვენი ქომაგების გული მოიგო და კმაყოფილები ვართ, რომ ოთარი „შავ-თეთრებში“ კიდევ ორი სეზონი დარჩება“, - თქვა ჯერემი დევიდსონმა.

კონტრაქტის გახანგრძლივების შემდეგ კომენტარი 23 წლის ქართველმა მორაგბემაც გააკეთა:

„ძალიან ბედნიერი ვარ, რომ ამ კლუბში თამაშს გავაგრძელებ. იმედია, ერთად კარგ სეზონს ჩავატარებთ. აქ თავს ნამდვილად კარგად ვგრძნობ, ამ გუნდსა და ამ ქალაქში“, - აღნიშნა ოთარმა.

შეგახსენებთ, გიორგაძე „ბრივს“ 2018 წლის ზაფხულში „კლერმონიდან“ შეუერთდა და 22 მატჩში 8 ლელო მიითვალა. ცოტა ხნის წინ დასრულებულ მსოფლიო თასზე კი, საქართველოს ნაკრების ღირსება ოთხივე მატჩში დაიცვა და ურუგვაისთან საუკეთესო მოთამაშედაც დასახელდა.