შიდა რაგბი

10:41 | 27.10.2019 | ნანახია 918 - ჯერ

დიდი 10 | აკადემია 16:24 ჯიქი

კაცნაკლულმა გორის ‘ჯიქმა’ დასკვნით 20 წუთში 11 უპასუხო ქულა აიღო და დიდი 10-ის მიმდინარე გათამაშებაში ზედიზედ მეორე, სულ კი მესამე გამარჯვება მოიპოვა, რითაც ექვსეულში დაბრუნდა.

თბილისის ‘აკადემიას’ ამ მატჩამდე ზედიზედ სამი მოგება ჰქონდა და თუ ამ სერიას გააგრძელებდა, პირველ ადგილზე აღზევდებოდა. პირველი ტაიმის შემდეგ, მასპინძლები 13:10 იგებდნენ და მიზანთანაც ახლოს იყვნენ, მაგრამ დასკვნით წუთებში თამაში დათმეს.

ანგარიში გორელებმა მე-5 წუთზე გახსნეს. მათ მოლით წინ წაიწიეს, რაქიდან კი სალელოვედ არასენ ტრაპაიძემ შეუტია, რასაც რეზი ჯინჭველაშვილმა ზუსტი გარდასახვა მიაყოლა. ‘აკადემიამ’ თავიდან ჯარიმის კარში დარტყმაზე უარი თქვა და ლელოს გატანა სცადა, მაგრამ მერე დავით მოძღვრიშვილმა სამიდან ორი გაიტანა და სხვაობა მინიმუმამდე დაიყვანა - 6:7.

მოძღვრიშვილმა ქულების აღება ლელო-გარდასახვით განაგრძო. ‘ჯიქმა’ თავის 22-ში შეცდომა დაუშვა, ‘აკადემიამ’ არეულ დაცვას ხელით შეუტია და თავიდან უკან დაიხია, მაგრამ მერე მათი მგეზავი ფინტებით სამ მცველს დაუსხლტა, ხაზი გაჭრა და 40-მეტრიანი გარღვევა ლელოთი და ზუსტი გარდასახვით დაასრულა.

პირველი ტაიმის ბოლოს ჯინჭველაშვილმა ჯარიმით ჩამორჩენა შეამცირა, 53-ე წუთზე წონასწორობა აღადგინა, კიდევ ხუთ წუთში კი, მოძღვრიშვილის ჯარიმას უპასუხა და ანგარიში 16:16 გახადა. აღსანიშნავია, რომ მიშო მასხარაშვილის წითელი ბარათით გაძევების შემდეგ, ‘ჯიქი’ 55-ე წუთიდან კაცნაკლული თამაშობდა.

მიუხედავად ამისა, სტუმრებმა შეძლეს მეტოქის წნეხში მოქცევა და 22-ში შეცდომა დააშვებინეს, შერკინებიდან შეტევის შემდეგ კი, ტრაპაიძემ თავისი მეორე ლელო გაიტანა. ‘აკადემიამ’ ხელდახელ სცადა შეტევები და ერთხელ ლელოს გატანის შანსიც ჰქონდა, მაგრამ უმეტესად თავის ნახევარზე მოუწია ბურთაობა, დაჯარიმდა და ჯინჭველაშვილმა სტუმრებს მოგება დაუბევა - 24:16.

rugby.ge


კომენტარები (0)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
0.084359