საქართველოს მორაგბეთა ნაკრების კაპიტანმა მერაბ შარიქაძემ ავსტრალიასთან (8:27) მარცხის შემდეგ ისაუბრა. ქართველი მორაგბის განცხადებით, ყველაფერი გააკეთეს, რომ მსგავსი ანგარიშით არ დამარცხებულიყვნენ, მაგრამ შეცდომები დაუშვეს. მერაბმა იმედი გამოთქვა, რომ მომავალში ნაკრები თამაშს გამოასწორებს.

გარდა ამისა, შარიქაძე იმედოვნებს, რომ მომდევნო მსოფლიო თასზე "ბორღალოსნები" უკეთეს შედეგს დააფიქსირებენ:

"ყველაფერი გავაკეთეთ იმისთვის, რომ ასეთი ანგარიშით არ წაგვეგო. იმედია მომავალში გამოვასწორებთ და ასეთ თამაშებში შეტევაში უკეთ ვითამაშებთ. თამაშებს ვერ მოიგებ თუ კი ქულებს ვერ მოიპოვებ, ეს კი იმას ნიშნავს, რომ შეტევაში თამაში უნდა გამოვასწოროთ. თოდუას ლელოს დროს ანგარიშში სხვაობა მცირე იყო და ვფიქრობდით, რომ თამაშში დაბრუნება შეგვეძლო, მაგრამ ავსტრალია ძალიან ძლიერი გუნდია, რომელმაც ყველა შესაძლო შანსი გამოიყენა. ჩვენი მიზანი მსოფლიო თასზე დაფიქსირებული შედეგისგან განსხვავებული იყო, გულშემატკივრებს სხვა შედეგი სურდათ. ყველაფერი გავაკეთეთ რაც შეგვეძლო, თუმცა შეცდომები დავუშვით, რომლებიც მეტოქეებმა კარგად გამოიყენეს და ქულები დავკარგეთ. ახალგაზრდა გუნდი გვყავს და იმედი გვაქვს, რომ შემდეგ მსოფლიო თასზე უკეთეს შედეგს ვაჩვენებთ", - განაცხადა შარიქაძემ.

შეგახსენებთ, რომ საქართველოს მორაგბეთა ნაკრებმა მსოფლიო თასზე გამოსვლა D ჯგუფში 1 მოგებითა და 3 წაგებით დაასრულა. მილტონ ჰეიგის გუნდმა საბოლოოდ ქვეჯგუფში 5 ქულით მეოთხე ადგილი დაიკავა და მხოლოდ ურუგვაის ნაკრებს აჯობა.