საქართველოს ნაკრების მთავარმა მწვრთნელმა მილტონ ჰეიგმა ურუგვაისთან (33:7) მატჩის შემდეგ ისაუბრა. ახალ ზელანდიელი სპეციალისტის განცხადებით, ეს გამარჯვება ძალიან მნიშვნელოვანი იყო, რადგან ამ თამაშისთვის ბევრი იშრომეს.

„ნამდვილად ვამაყობ ბიჭები და ჩვენი დღევანდელი თამაშით. ძალიან მნიშვნელოვანი იყო პირველი გამარჯვება. ბოლო ოთხი თვის განმავლობაში ძალიან ბევრი ვიშრომეთ და ეს ამ სამუშაოს შედეგი იყო. ვიცოდით, რომ ურუგვაისთვის 4-დღიან ინტერვალში თამაში რთული იქნებოდა და მეორე ნახევარში დაიღლებოდნენ. პირველ ტაიმში ცოტა გაგვიჭირდა, მაგრამ შესსვენებაზე ბიჭებს ვუთხარი, რომ აქცენტი ფაზებზე გაეკეთებინათ.

ეს თამაში რომ წაგვეგო, ის შრომა, რომელიც ამდენი ხნის განმავლობაში გავწიეთ, წყალში ჩაიყრებოდა. ეს იყო რეაქცია, რომელიც მსურდა გუნდს ეჩვენებინა. როდესაც გუნდი ზეწოლის ქვეშაა, ეს უნდა გამოიყენო როგორც მოტივაცია და ვფიქრობ, ბიჭები ამას კარგად გამოეხმაურნენ“, - აღნიშნა ჰეიგმა.

შეგახსენებთ, საქართველოს ნაკრებს ორ მატჩში 5 ქულა აქვს და მომდევნო ტურში 3 ოქტომბერს, ფიჯის დაუპირისპირდება.