იაპონიაში მიმდინარე რაგბის მსოფლიო თასზე B ჯგუფში მეორე შეხვედრა გაიმართა და იტალიამ ნამიბიასთან დაგეგმილი გამარჯვება მოიპოვა.

შეხვედრაში ფავორიტი "აძური" იყო, თუმცა პირველი ლელო ნამიბიამ დადო - დამიან სტივენსმა მეხუთე წუთზე გამოიჩინა თავი და გარდასახვა კლივენ ლუბსერმა ზუსტად შეასრულა. ამის შემდეგ უპირატესობა იტალიამ იგდო ხელთ - 25-ე წუთზე ტომაზო ალანმა ლელო დადო და გარდასახვა ზუსტად შეასრულა, ხოლო პირველი ტაიმის ბოლოს ტიტო ტებალდიმ ლელოთი იტალია კიდევ უფრო დააწინაურა.

მეორე ტაიმში 43-ე და 46-ე წუთზე ედოარდო პადოვანიმ და კარლო კანამ მიითვალეს ლელოები. 56-ე წუთზე ნამიბიამ ანგარიშის შემცირება შეძლო - თავი გრეილინგმა გამოიჩინა. მატჩის მიწურულს ჯაკე პოლედრიმ (69წ) და მატეო მინოციმ (75წ) ნამიბია დაალელოეს, ხოლო ნამიბიის მხრიდან ჩად პლატომ (80წ) გამოიჩინა თავი. საბოლოოდ იტალიამ 47:22 მოიგო და პრემიალური ქულაც აიღო.

B ჯგუფში იტალია ხუთი ქულით გალიდერდა, ხოლო მეორე ადგილზე ახალი ზელანდიაა ოთხი ქულით. მომდევნო მატჩს "აძური" 26 სექტემბერს კანადასთან გამართავს, ხოლო ნამიბია 28 სექტემბერს სამხრეთ აფრიკას დაუპირისპირდება.