საქართველოს მორაგბეთა ეროვნული ნაკრების კაპიტანმა მერაბ შარიქაძემ 2019 წლის მსოფლიო თასის დაწყებამდე საკუთარი გუნდის შესახებ ისაუბრა და აღნიშნა, რომ მთელი კონცენტრაცია პრობლემების აღმოფხვრისკენაა მიმართული. მან ასევე საკუთარი ტრავმის შესახებაც გააკეთა კომენტარი და თქვა, რომ დიდი ალბათობით უელსთან გასამართ მატჩში მონაწილეობას მიიღებს.

- მსოფლიო ჩემპიონატი და მოლოდინები

- „სანამ მსოფლიო ჩემპიონატზე წავალთ, იქამდე შოტლანდიასთან თამაში გვაქვს გამოსასწორებელი. აღნიშნული მატჩი ჩვენთვის ძალიან არასასურველი შედეგით დასრულდა და ძალიან ბევრი გვაქვს სამუშაო. სწორედ ამ პრობლემების აღმოფხვრისკენ არის ახლა ჩვენი კონცენტრაცია მიმართული.

- შანსები უელსთან...

- განვმეორდები და ვიტყვი, რომ შოტლანდიასთან ჩვენი თავი კიდევ ერთხელ უნდა გამოვცადოთ. თუ რამდენაც შეგვიძლია შეცდომების გამოსწორება და ამის შემდეგ აქტიურად ვიფიქრებთ უელსზე. შოტლანდიასთან მატჩი ჩვენთვის საუკეთესო ვარჯიში იქნება, თუ შეიძლება ამას ვარჯიში ეწოდოს.

- ტრავმის შესახებ...

- ჩემს ტრავმას რაც შეეხება - რეაბილიტაცია უკვე მიმდინარეობს და ძალიან დიდი იმედი მაქვს, რომ პირველივე მატჩზე შევძლებ თამაშს. ყოველ შემთხვევაში მიზანი ეს არის და იმედია გამოვა“ - გვითხრა მერაბ შარიქაძემ.

შეგახსენებთ, რომ რაგბის მსოფლიო თასის გათამაშება 20 სექტემბრიდან 2 ნოემბრის ჩათვლით გაიმართება, სადაც საქართველოს მორაგბეთა ნაკრები მეხუთედ იასპარეზებს. ჩვენი გუნდი D ჯგუფში უელსის, ურუგვაის, ფიჯის და ავსტრალიის ეროვნულ გუნდებთან ითამაშებს. მანამდე კი 6 სექტემბერს შოტლანდიას დაუპირისპირდება.