იაპონიის მორაგბეთა ეროვნულმა ნაკრებმა წყნარი ოკეანის თასის გათამაშება მესამედ მოიგო. მოახლოებული მსოფლიო თასის მასპინძლებმა შეჯიბრი ძალიან დამაჯერებლად იასპარეზეს და ფიჯისა და ტონგას კვალად, გუშინ უმთავრეს კონკურენტ აშშ-საც იოლად აჯობა - 34:20.
ტურნირის დასკვნითი შეხვედრები ფიჯის დედაქალაქ სუვაში ჩატარდა. იაპონელებმა ბევრი რამ საწყის ათიოდ წუთში გადაწყვიტეს, როდესაც მაიკლ ლიტჩისა და კენკი ფუკუოკას ლელოებისა და იუ ტამურას ფეხჩუბინობის წყალობით, 17:0 დაწინაურდნენ.
ამ უკანასკნელმა, საბოლოო ჯამში, 14 ქულა მოაგროვა, მე-2 ტაიმში ლიტჩმა დუბლი შეასრულა, იაპონელთა კიდევ 1 ლელო კი რიოჰეი იამანაკამ დადო.
შედეგად, “საკურებმა” სამ თამაშში მაქსიმალური – 15 ქულა აიღეს და პირველობა სადავო არ გაუხდიათ, ამასთან, უახლოეს კონკურენტებს – ფიჯისა და აშშ-ს ხუთ-ხუთი ქულით აჯობეს.
კუნძულელებმა, რომლებიც მომავალ მსოფლიო თასზე საქართველოს ნაკრების მეტოქეები არიან, საწყისი შეხვედრა იაპონიასთან დათმეს, დასკვნით ტურებში კი, კანადასა და სამოას აჯობეს.
გუშინდელი მატჩი სანახაობრივი ნამდვილად არ ყოფილა. ფიჯი შინ კი თამაშობდა, თუმცა, ბურთს მეტწილად სამოა ფლობდა და წარმატებას მხოლოდ მცირე დეტალების გამო ვერ მიაღწია.
შეხვედრის პირველ ტაიმში ბენ ვოლავოლამა და ულუპანო სეუტენიმ ჯარიმები გაცვალეს, შესვენების შემდეგ კი, მხოლოდ 1 შედეგიანი შეტევა გქვონდა: ვერენიკი გონევას ლელო იმავე ვოლავოლამ გარდასახა – 10:3.