ფიჯის მორაგბეთა ეროვნულმა ნაკრებმა, რომელიც 2019 წლის მსოფლიო თასზე “ბორჯღალოსანთა” ერთ-ერთი მეტოქეა, მომავალი ტურნირისთვის მზადების ციკლში პირველი მატჩი გამართა და სახელოვანი გამარჯვება იზეიმა.
“მფრინავი ფიჯელები” ქვეყნის დედაქალაქ სუვაში ახალიზელანდიელ მაორებს დაუხვდნენ და 27:10 მოიგეს. მასპინძლებმა 4 ულამაზესი ლელოს დადება მოახერხეს, რასაც სტუმრებმა მხოლოდ 2 შედეგიანი შეტევით უპასუხეს.
ფიჯის ნაკრები მთელი შეხვედრის განმავლობაში ჩინებულად გამოიყურებოდა და ლაღი თამაშით საყოველთაო აღტაცება გამოიწვია.
საინტერესოა, რომ ფიჯელებმა “მაორი ოლ ბლექსს” 1957 წლის შემდეგ პირველას აჯობეს, საერთო ჯამში კი, გუნდებს შორის 30-ე შეხვედრაში მერვედ იმარჯვეს. აღნიშნული მეტოქეები ერთმანეთს კიდევ ერთხელ 20 ივლისს გაეჯიბრებიან და ზელანდიელებს რევანშის შანსი მიეცემათ.
შეგახსენებთ, რომ საქართველოსა და ფიჯის ნაკრებები მსოფლიო თასის დ ჯგუფში მოხვდნენ, სადაც მეტოქეებად ავსტრალია, უელსი და ურუგვაიც ეყოლებათ. “ბორჯღალოსნებისა” და “მფრინავი ფიჯელების” შერკინება 3 ოქტომბერს, იაპონიის ქალაქ ჰიგაშიოსაკაში შედგება.