შიდა რაგბი

17:23 | 25.03.2019 | ნანახია 446 - ჯერ

დიდი 10: "აიამ" ფლეი ოფი თითქმის დაიბევა

ქუთაისის ‘აიამ’ დიდი 10-ის მე-16 ტურში უშუალო კონკურენტი გორის ‘ჯიქი’ 23:17 დაამარცხა და საფლეიოფო ექვსეულში მოსახვედრად დარჩენილი ორი მატჩიდან ერთის მოგება ყოფნის.

„აია არენაზე“ გამართულ შეხვედრაში ანგარიში მასპინძლებმა მე-14 წუთზე გახსნეს. თანმიმდევრული შეტევისას ‘აიამ’ ყველა ჯერზე შეძლო უპირატესობის მოპოვება, მიხეილ ბაბუნაშვილმა მბოჭავი კონტაქტით ჩამოიშორა და მისი ლელო თედო აბჟანდაძემ გარდასახა. ‘ჯიქმა’ 10 წუთში სანდრო ფურცხვანიძეს ჯარიმით უპასუხა, 30-ე წუთზე კი დაწინაურდა: დერეფნიდან შეტევის შემდეგ, გიორგი მჭედლიშვილმა წინ წაიწია, რატი ხუციშვილმა ხაზი გაჭრა და მისი ლელო ფურცხვანიძემ გარდასახა - 7:10.

მეორე ტაიმის დასაწყისში აბჟანდაძემ ჯარიმით წონასწორობა აღადგინა, ხოლო 56-ე წუთზე მასპინძლები დააწინაურა, 63-ე წუთზე კი გიორგი აბრამიძემ ლელო გაიტანა და ის აბჟანდაძემ გარდასახა. ‘ჯიქმა’ 69-ე წუთზე უპასუხა, დიტო კიკნაძემ ჯარიმა სწრაფად გაითამაშა და ბურთი მოშიშვლებულ ზურგში გადაკიდა, მას ნიკა ბიწაძე მიყვა და ლელო გაიტანა, ხოლო კიკნაძემ გარდასახა. გორელებს მატჩის გადარჩენის იმედი გაუჩნდათ, მაგრამ ჯარიმა თავად მიიღეს და ‘აიამ’ 23:17 იმარჯვა.

ქუთაისელები ამ მოგებით მეოთხე ადგილამდე აღზევდნენ და მისი შენარჩუნებით ფლეი ოფის პირველ ეტაპზე მასპინძლობის უფლებას მიიღებენ, ‘ჯიქი’ კი მეექვსე ადგილზეა და მის შესანარჩუნებლად ბრძოლა მოუწევს.

www.rugby.ge

თეგებიაიაჯიქი

კომენტარები (0)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
0.10689