ესპანეთის მორაგბეთა ეროვნული ნაკრები თბილისში საქართველოსთან სათამაშოდ გადახალისებული შემადგენლობით მოდის.
“ლომების” მთავარმა მწვრთნელმა სანტიაგო სანტოსმა 30-კაციანი გაფართოებული რაზმი დაასახელა, სადაც 7 დებიუტანტია, 13 მორაგბეს კი ეროვნულ გუნდში 4 ან ნაკლები მატჩი აქვს ჩატარებული.
ესპანელთა სიაში ყველაზე გამოცდილი “ორდიზიას” ბურჯი ფერნანდო ლოპესია, რომელსაც ზურგს 35 სანაკრებო თამაში უმაგრებს.
შეგახსენებთ, რომ რაგბი ევროპის ჩემპიონატის სასტარტო ტურში ესპანელებმა მადრიდში რუსეთს 16:14 სძლიეს, საქართველომ კი კლუჟში რუმინეთს მოუგო – 18:9.
“ბორჯღალოსნებისა” და “ლეონესის” შერკინება კვირას, 17 თებერვალს, ავჭალის სტადიონზეა დაგეგმილი და 18:00 საათზე დაიწყება.