შიდა რაგბი

15:40 | 11.02.2019 | ნანახია 340 - ჯერ

დიდი 10: 5 ქულით პატარძეულიდან

დიდი 10-ის ლიდერმა ‘ბათუმმა’, მე-13 ტურში პატარძეულის ‘ვეფხვები’ 38:10 დაამარცხა და პოზიციები გაიმყარა.

შეხვედრა წვიმაში გაიმართა და ზღვისპირელებმა ძალისმიერ თამაშში თავიდანვე მოიპოვეს უპირატესობა. ანგარიში პირველსავე წუთზე მამუკა ნინიძემ ჯარიმით გახსნა, მე-4 წუთზე კი ბექა ურჯუკაშვილმა შეხვედრის პირველი ლელო გაიტანა და ნინიძემ გარდასახა. მე-16 წუთზე მასპინძლები უკვე საჯარიმო ლელოთი დაისაჯნენ და ‘ბათუმი’ 17:0 დაწინაურდა.

ტაიმის შუაში ჟორა მღებრიშვილმა ერთი ლელო გაქვითა, მაგრამ მალევე ხვიჩა ბუჯიაშვილმა სტუმართა მესამე ლელო გაიტანა, ხოლო 35-ე წუთზე თავი ნუკრი ფერსელიძემ გამოიჩინა, ნინიძემ ორივე გარდასახა და ტაიმი 31:5 დასრულდა.

მეორე ტაიმის დასაწყისში დავით ტრაპაიძემ ‘ბათუმის’ მეხუთე ლელო გაიტანა და უპირატესობა კიდევ უფრო გაზარდა. 54-ე წუთზე ჟორა მღებრიშვილმა დუბლი შეასრულა და მას შემდეგ ანგარიში აღარ შეცვლილა. ‘ბათუმმა’ 38:10 მოიგო, ბონუსიც აიღო და მის ლიდერობას მინიუმ ორი ტური არაფერი ემუქრება, ‘ვეფხვებს’ კი მდევარი წამოეწია.

www.rugby.ge


კომენტარები (0)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
0.08023