საქართველოს მორაგბეთა ნაკრებმა რაგბი ევროპის 2019 წლის გათამაშება წარმატებით დაიწყო. მილტონ ჰეიგის გუნდი კლუჟში, რუმინეთის ნაკრებს ესტუმრა და პირველი გამარჯვება მოიპოვა.

შეხვედრა რუმინელთა უპირატესობით დაიწყო და ფლორიან ვლაიკუს ორი ზუსტი ჯარიმის შემდგე 6:0 დაწინაურდნენ. „ბორჯღალოსნებმა“ პირველ ტაიმში მხოლოდ ის შეძლეს, რომ თედო აბჟანდაძემ ერთი ჯარიმა გაიტანა და შესვენებაზე მასპინძლები სამქულიანი უპირატესობით გავიდნენ.

საქართველოს ნაკრებმა მეორე ტაიმი გაცილებით მაღალ დონეზე ჩაატარა და მეტოქეს შანსი არ დაუტოვა. „ბორჯღალოსნებმა“ უპირატესობა ორ ლელოში გარდასახეს, რომელთაგანაც ერთი ბექა გორგაძემ შესანიშნავ სტილში დაამიწა, ხოლო მანამდე ტექნიკური ლელო ჩაგვითვალეს. ამას დაემატა აბჟანდაძის ზუსტი ჯარიმა. საპასუხოდ, ვლაიკუმ ერთადერთი ჯარიმა გაიტანა და შედეგად, საქართველოს ნაკრებმა რუმინეთში 18:9 მოიგო.

გარდა ამისა, "ბორჯღალოსნებს" „ანთიმოზ ივერიელის თასი“ გადაეცათ, რომელიც ამ ორი გუნდის დაპირისპირებაში თამაშდება გამარჯვებულის საკუთრება ხდება.

საქართველოს ნაკრები რაგბი ევროპის გათამაშებაში მომდევნო მატჩს 17 თებერვალს, თბილისში, ესპანეთის ნაკრებთან ჩაატარებს.

რუმინეთი - საქართველო 9:18 (6:3)

ქულები: ვლაიკუ (8, ჯარიმა), ვლაიკუ (27, ჯარიმა) აბჟანდაძე (39, ჯარიმა), ტექნიკური ლელო (გარდასახვა, 46), გორგაძე (ლელო, 65), ვლაიკუ (ჯარიმა 72), აბჟანდაძე (80, ჯარიმა)