რუსული “ენისეის” ქართველი მორაგბე მიხეილ გაჩეჩილაძე “ჩელენჯ ქაფის” 3 ტურის თავზე საუკეთესო მბოჭავთა სიაში პირველ ადგილზე იმყოფება. ამ ინფორმაციას ტურნირის ოფიციალური ვებ-გვერდი ავრცელებს.
როგორც ირკვევა, ამ დროისთვის ქართველი მესამეხაზელის აქტივში 60 ბოჭვაა, მის გუნდს კი სამივე გასული მატჩი წაგებული აქვს. კრასნოიარსკელები 2-ჯერ ფრანგულ “ლა როშელთან” დამარცხდნენ (21:82, 26:64), ერთხელ კი – იტალიურ “ძებრესთან” (14:31).
შეგახსენებთ, რომ 27 წლის გაჩეჩილაძე “ენისეის” ღირსებას 2016 წლიდან იცავს, საქართველოს ეროვნულ ნაკრებში კი 8 მატჩი აქვს ჩატარებული და მის აქტივში 2 ლელოა.