22 წლის ქართველი მორაგბე ირაკლი ცხადაძე (სიმაღლე 1.92 მ. წონა 105 კგ.) ფრანგული “ბრივის” წევრი გახდა. აქამდე, ირაკლი “ბორდოში” ირიცხებოდა, ახალ კლუბთან კი კონტრაქტი 2021 წლამდე გააფორმა.
ცხადაძემ, რომელიც პოზიციით მესამეხაზელი გახკლავთ, კარიერა თბილისურ “არმაზში” დაიწყო, ბორდოელთა ესპუარების გუნდში კი 2016 წლიდან ირიცხებოდა.
ირაკლის 2016 წლის ახალგაზრდულ მსოფლიო თასზე ოთარ გიორგაძისა და ვასილ ლობჟანიძის მხარდამხარ უთამაშია, რომლებიც “ბრივში” მისი თანაგუნდელები იქნებიან.
ამგვარად, ბრიველთა რიგებში უკვე ქართველი 6 ლეგიონერი გვყავს. ცხადაძის, გიორგაძისა და ლობჟანიძის გარდა, ესენი კარლენ ასიეშვილი, სოსო ბეკოშვილი და ლუკა გოგინავა არიან.
საინტერესოა, რომ ფრანგული გუნდის ოფიციალური ვებ-გვერდი ცხადაძის ტრანსფერს ორიგინალურად გამოეხმაურა და მისი გვარი იმ ქართველ მორაგბეთა გვარების საშუალებით გამოხატა, რომელსაც კლუბში აქამდე უთამაშიათ.
“ირაკლი ცხადაძე იმედისმომცემი, ძლიერი და აგრესიული ახალგაზრდა მესამეხაზელია, ასე რომ, მომავალი 2 სეზონის განმავლობაში მისი იმედი გვაქვს”, - აღნიშნა “ბრივის” მენეჯერმა ჯერემი დევიდსონმა.
შეგახსენებთ, რომ “ბრივი” ამჟამად ფრანგულ პრო დ2-ში ირჯება და 13 ტურის თავზე 37 ქულით მე-4 ადგილზე იმყოფება, მომდევნო მატჩს კი 6 დეკემბერს, სტუმრად, “პროვენსთან” გამართავენ.