საქართველოს ეროვნული ნაკრების ახალწვეული – ფრანგული “გრენობლის” ბურჯი ბექა გიგაშვილი ტოპ 14-ს მე-8 ტურის სიმბოლურ ნაკრებში მოხვდა.
შეგახსენებთ, რომ გასულ ტურში გრენობლელები სტუმრად “აჟენს” დაუზავდნენ (9:9), გიგაშვილი კი სასტარტო შემადგენლობაში იყო და 57-ე წუთზე ადგილი დუდუ ქუბრიაშვილს დაუთმო.
“გრენობლს” სატურნირო ცხრილში 12 ქულა აქვს და მე-11 ადგილზე იმყოფება, მომდევნო მატჩს კი 3 ნოემბერს, შინ, “კლერმონთან” გამართავს.
შეგახსენებთ, რომ როგორც გიგაშვილი, ასევე ქუბრიაშვილი ნოემბრის ტესტებისთვის “ბორჯღალოსანთა” რიგებში არიან გამოძახებულნი. თუკი დუდუს ეროვნულ გუნდში 45 მატჩი აქვს ჩატარებული, ბექა ნაკრების მაისურს პირველად მოირგებს.