თი ბი სი რაგბის სერიები 2018-ის დაწყებამდე ერთი თვე რჩება. ესაა ტრადიცია, რომელსაც შარშან საქართველოს რაგბის კავშირმა და თი ბი სიმ ერთობლივად ჩაუყარეს საფუძველი. წელსაც, მოწინავე სარაგბო ქვეყნების მსგავსად, საქართველოს ნაკრების ნოემბრის ტესტ-მატჩებს სახელობითი სერიის სახე მიენიჭება და მის ფარგლებში ბორჯღალოსნები სამ ტესტს გამართავენ.

გასვლაზე იტალიასთან და ორი საშინაო მატჩი

10 ნოემბერს, სერიის პირველ მატჩში, საქართველოს ნაკრები იტალიას ფლორენციაში, „არტემიო ფრანკის“ სტადიონზე ეთამაშება;

17 ნოემბერს, თბილისში თიბისი რაგბის სერიების პირელი საშინაო მატჩი გაიმართება, რომელშიც ბორჯღალოსნები სამოას უმასპინძლებენ, ხოლო 2018 წლის თიბისი რაგბის სერიების დამაგვირგვინებელ შეხვედრაში, საქართველოს ნაკრები ტონგას 24 ნოემბერს შეხვდება.

თი ბი სი ბანკში გამართულ პრეზენტაციაზე მედიას და საზოგადოებას თიბისის მარკეტინგის დირექტორმა ნინო ეგაძემ, რაგბის კავშირის პრეზიდენტმა გოჩა სვანიძემ და ბორჯღალოსანთა თავკაცმა მილთონ ჰეიგმა მიმართეს.

ნინო ეგაძე: „დღეს განსაკუთრებული დღეა. თი ბი სი რაგბის სერიების დაწყებამდე ერთი თვე დარჩა და გულშემატკივარმა დღეების ათვლა დაიწყო. თი ბი სისა და რაგბის კავშირის მეგობრობა წლებს ითვლის და შემოდგომის სერიების თი ბი სის ეგიდით ჩატარება უკვე ტრადიციად იქცა.

„იტალიისა და საქართველოს ნაკრებების შეხვედრას ყველა მოუთმენლად ელოდება და ჩვენს განსაკუთრებულად ვემზადებით. თი ბი სი იტალიისკენ დაახლოებით 1000 კაციანი დელეგაციით მიემგზავრება, ვიცით, რომ ფლორენციაში კიდევ რამდენიმე ათასი ქართველი იქნება და ვფიქრობ, ის დიდი მუხტი, რომელიც ტრიბუნებზე შეიქმნება, აუცილებლად დაეხმარება ჩვენს გუნდს“.

გოჩა სვანიძე: „თიბისი ბანკი ჩვენი საიმედო პარტნიორია და ეს მეგობრობა წლებია გრძელდება. თი ბი სი რაგბის სერია, რომელიც შარშან დაიწყო, ტრადიციად იქცა. ჩვენ ამ მეგობრობას პასუხი გამარჯვებებით უნდა გავცეთ. საქართველოსა და იტალიის ნაკრებების შეხვედრას არა მხოლოდ საქართველოში, მთელს მსოფლიოში ელიან. გველის ორი საშინაო თამაში საქართველოში. ადგილი ჯერ დაზუსტებული არაა და არაა გამორიცხული, რომ გეოგრაფია გავზარდოთ. ნოემბრის სერიას მობილიზებული ვხვდებით და დანარჩენი მოედანზე გამოჩნდება“.

მილთონ ჰეიგი: „თიბისი სერია მნიშვნელოვანია როგორც სპორტული, ასევე ჩვენი ურთიერთობის გაგრძელების კუთხით. მთელი ნაკრების სახელით მინდა მადლობა გადავუხადო თიბისის, როგორც მეგობარს და პარტნიორს. წინ გველის მატჩი იტალიასთან და ორი ძალიან მნიშვნელოვანი შეხვედრა სახლში. ზაფხულის ტესტებზე კარგად ვერ გამოვიყურებოდით და მნიშვნელოვანია, მომავალი თამაშები შინ, სამოასთან და ტონგასთან მაღალ დონეზე ჩავატაროთ“.

ინფორმაცია 2018 წლის თიბისი რაგბის სერიების საშინაო მატჩების სტადიონების და ბილეთების შესახებ დამატებით, მალე გამოქვეყნდება!

მეტოქეების შესახებ

იტალიასთან მეოთხედ

იტალიას ისტორიაში მეოთხედ, 15-წლიანი პაუზის შემდეგ კვლავ სტუმრად შევხვდებით. პირველად ამ მეტოქეს 1998 წელს ლაკვილაში, 1999 წლის მსოფლიო თასის შესარჩევი ეტაპის მატჩში შევხვდით და მასპინძლებმა 31:14 იმარჯვეს. 2000 წელს, ექვსი ერის ზღვარზე მყოფმა იტალიამ ლივორნოში მიგვიღო და 51:7 იმარჯვა.

„აძურას“ ბოლოს 2003 წელს ვეთამაშეთ. მაშინ გუნდები მსოფლიო თასისთვის ემზადებოდნენ და ასტიში მაყურებელმა დაძაბული ბრძოლა იხილა, შეხვედრა კი იტალიის ნაკრების 9-ქულიანი გამარჯვებით დასრულდა - 31:22.

მომავალი შეხვედრა 10 ნოემბერს ფლორენციაში, საფეხბურთო კლუბ ‘ფიორენტინას’ სტადიონზე, ‘არტემიო ფრანკიზე’ გაიმართება, რომელიც 1931 წელს აშენდა, 1990 წელს რეკონსტრუქცია ჩაუტარდა და 43 147 მაყურებელს იტევს.

‘არტემიო ფრანკიმ’ საერთაშორისო სარაგბო მატჩს ორჯერ უმასპინძლა და იტალიელთა ისტორიული გამარჯვების მოწმეა: „აძურამ“ 2010 წლის 20 ნოემბერს ფლორენციაში ავსტრალია მიიღო და 14:32 დამარცხდა, ხოლო 2016 წელს 19 ნოემბერს სამხრეთ აფრიკას უმასპინძლა და ამ გუნდთან არსებობის ისტორიაში პირველი გამარჯვება იზეიმა - 20:18.

მოცემული მომენტისთვის საქართველო და იტალია მსოფლიო რეიტინგში მეზობლად არიან. ბორჯღალოსნები 73,13 ქულით მე-13 საფეხურს იკავებს, ხოლო იტალია 72,56 ქულით მას კვალში უდგას.

მეხუთედ სამოასთან

იტალიიდან შინ მობრუნებული ბორჯღალოსნები 17 და 24 ნოემბერს თბილისში ორ ტესტ-მატჩს გამართავენ. 17 ნოემბერს საქართველოს სამოა მესამედ ეწვევა და ჩვენს გუნდთან მეხუთე მატჩს გამართავს.

კუნძულელებთან პირველი ნაცნობობა 2003 წელს, ავსტრალიაში გამართულ მსოფლიო თასზე შედგა. ბორჯღალოსნები სარაგბო ელიტაში პირველ ნაბიჯებს დგამდნენ და ძლიერ მეტოქესთან ვერაფერს გახდნენ - 9:46.

განვითარების ეტაპების გავლის შემდეგ, უკვე მოძლიერებულმა ბორჯღალოსნებმა მეორე დონის ქვეყნის ნაკრებებთან ტესტ-მატჩების გამართვის უფლება მოიპოვეს და პირველი შეხვედრიდან 10 წლის თავზე, 2013 წლის ნოემბერში საქართველოს სამოა პირველად ეწვია. გიორგობა დღეს (23 ნოემბერს), ჩვენმა გუნდმა დაძაბულ ბრძოლაში პირველი დიდი გამარჯვება მოიპოვა და იმ მომენტისთვის რეიტინგში მე-8 ადგილზე გამაგრებული სამოა 16:15 დაამარცხა.

საქართველო სამოას საპასუხო ვიზიტით 2016 წელს ეწვია, აპიაში მეტოქეს არაფერი დაუთმო და შეხვედრა ფრედ, 19:19 დაასრულა.

იმავე წლის ნოემბერში სამოელებს მეორედ ვუმასპინძლეთ თბილისში. თამაში ამჯერადაც ‘მიხეილ მესხზე’ გაიმართა და დაძაბულ ბრძოლაში გამარჯვება კვლავ ქართველებს დარჩათ - 20:16.

ამრიგად, სამოასთან, რომელიც დღეისათვის მსოფლიო რეიტინგში მე-16 ადგილს იკავებს (68,28 ქულა), ჩვენს გუნდს დადებითი ბალანსი აქვს - 2 მოგება, 1 ფრე და 1 მარცხი.

მეშვიდედ ტონგასთან

სამოას კვალდაკვალ 24 ნოემბერს კიდევ ერთ კუნძულელს, ტონგას ვეთამაშებით, რომელთანაც განვლილ წლებში უკვე 6 ტესტ-მატჩი მოგვიგროვდა.

მათთან პირველად გასული საუკუნის მიწურულს, 1999 წლის მსოფლიო თასის შესარჩევ ეტაპზე გადავიკვეთეთ. 1999 წლის მარტში ტონგას პირველად და უკანასკნელად ვეთამაშეთ მათ მშობლიურ ნუკუ’ჰალოფაში და მატჩი მასპინძლების გამარჯვებით დასრულდა - 37:6. სამი კვირის თავზე კუნძულელები თბილისში საპასუხოდ გვეწვივნენ და მომწიფების გზაზე შემდგარმა ბორჯღალოსნებმა რევანში აიღეს, ოღონდ მეტოქეს მინიმალურად სძლიეს (28:27) და ორი მატჩის ჯამში 1999 წლის მსოფლიო თასზე ტონგა გავიდა.

2014 წლის ნოემბერში ტონგა მეორედ ეწვია თბილისს და ტესტ-მატჩში 23:9 იმარჯვა, თუმცა ერთი წლის თავზე, 2015 წლის მსოფლიო თასზე, გლოსთერში „სულ სხვა“ ბორჯღალოსნების პირისპირ აღმოჩნდნენ და საქართველოს ნაკრებმა 17:10 მოგებით ისტორიულ შედეგს (მსოფლიო თასზე ორი მოგება) ჩაუყარა საფუძველი.

მას შემდეგ საქართველომ მეტოქე კიდევ ორჯერ დაამარცხა და ორივეჯერ ნეიტრალურ მოედანზე, ტონგას მეზობელი ფიჯის ქალაქ სუვაში. 2016 წლის წყნარი ოკეანის წარმატებული ტურნეს ფარგლებში, მილთონ ჰეიგის შეგირდებმა მეტოქეს 23:20 სძლიეს, ხოლო ამა წლის ივნისში, უკვე წყნარი ოკეანის თასის ფარგლებში ბორჯღალოსნებმა ტონგას 16:15 სძლიეს და ამ მეტოქესთან დადებითი ბალანსი გაიმყარეს - 4 მოგება და 2 მარცხი.

მიუხედავად ამისა, 2018 წლის ნოემბრის ტესტებს ტონგა მსოფლიო რეიტინგში უკეთესი პოზიციით ხვდება - ის 73,84 ქულით მე-12 ადგილზეა.

www.rugby.ge