“რასინგ 92”-ის ახალგაზრდა ქართველმა ბურჯმა გურამ გოგიჩაშვილმა ტოპ 14-ში პირველად ითამაშა.

20 წლის მარცხენა ბურჯი, რომელიც ფრანგული კლუბის რიგებში, ოფიციალურ მატჩში პირველად გამოჩნდა, “აჟენთან” მოგებულ მატჩში (59:7) მოედანზე 53-ე წუთზე ვასილ კაკოვინის მაგივრად შემოვიდა.

აკვიტანიელთა რიგებში სრულად ითამაშა თამაზ მჭედლიძემ, ხოლო გიორგი თეთრაშვილი 48-ე წუთზე შეცვალეს.

რამდენიმე დღის წინაც გაუწყეთ და ახლაც შეგახსენებთ, რომ პარიზული კლუბის ძირითადი მარცხენა ბურჯი ედი ბენ აროუსი დაშავდა და მინიმუმ 3 კვირა ვერ ითამაშებს. შესაბამისად, მისი ადგილი ვასილ კაკოვინმა დაიკავა, მარქაფაში კი საქართველოს 20-წლამდელთა ნაკრების პირველხაზელი გამოჩნდა.