შიდა რაგბი

20:30 | 8.09.2018 | ნანახია 731 - ჯერ

დიდი 10 | მეორე ტური: "ლოკომოტივი" - "არმია"

დიდი 10-ის მეორე ტური 9 სექტემბერს „ავჭალაზე“, თბილისური დერბით დასრულდება. საქართველოს ჩემპიონი ‘ლოკომოტივი’ ‘არმიას’ მასპინძლობს და მატჩი 17:15 საათზე დაიწყება.

პირველ ტურში გუნდებმა განსხვავებული შედეგები აჩვენეს - პირველმა დიდი სხვაობით და ბონუს-ქულით მოიგო, მეორე დიდი სხვაობით დამარცხდა.

‘ლოკომოტივს’ მეტოქედ დიდი 10-ის დებიუტანტი პატარძეულის ‘ვეფხვები’ ყავდა, 7 ლელო გაიტანა და 47:22 იმარჯვა. სამი ლელო გაიტანა გასული სეზონის საუკეთესო მელელოვემ, ვეტერანმა გიორგი შკინინმა.

ჩემპიონმა გამარჯვებულ შემადგენლობაში მხოლოდ ორი ცვლილება განახორციელა. ზურაბ ძნელაძის ნაცვლად, რომელიც საქართველოს 7-კაცა ნაკრებთან ერთად პოლონეთში, ევროპის გრან პრის მეოთხე ეტაპზე თამაშობს, ცენტრში ვახტანგ კავთიძეს გიორგი ტალახაძე შეუწყვილდება, ხოლო შერკინების მესამე ხაზში ვასიკო ყველაიძეს ვიხილავთ. ძირითადშია შკინინი, რომელმაც გასული სეზონის მიწურულს ‘არმიას’ 6 ლელო გაუტანა.

‘არმიამ’ მიხეილ მასხარაშვილის წყვილი ლელოთი ‘აიას’ მეორე ტაიმი 14:7 მოუგო, მაგრამ პირველი 0:50 ჰქონდა წაგებული და საბოლოოდ 14:57 დამარცხდა. შედეგით უკმაყოფილო მწვრთნელებმა შემადგენლობის თითქმის ნახევარი, 7 მოთამაშე შეცვალეს.

‘ლოკომოტივთან’ მატჩში კვაჭი ჯონათან პაატაშვილი იქნება, მარჯვენა ბურჯი ვასილ ებრალიძე, ხოლო მეორე ხაზში დავით მგალობლიშვილი გამოჩნდება. 9 ნომერი შალვა დავითაშვილი იქნება. სრულად შეიცვალა ცენტრი, სადაც საბა ნიკოლავა და ნიკა ცირეკიძე შეწყვილდებიან, ხოლო გარემარბად თედო დევიძეს ვიხილავთ.

rugby.ge


კომენტარები (0)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
0.109074