ხვალ ნაშუადღევს გორის „ჭალის სტადიონი“ 2018/2019 წლების სეზონის დიდი 10-ის პირველ მატჩს უმასპინძლებს, რომელშიც ‘ჯიქი’ თბილისის ‘აკადემიას’ ერკინება.

პირველ ტურში ორივე გუნდი უქულოდ დარჩა და 9 სექტემბერს პირველი გამარჯვების მოპოვებას ეცდება. გორელები „შევარდენზე“ ‘არმაზს’ შეხვდნენ და 56-ე წუთამდე გამარჯვების შანსს ინარჩუნებდნენ, მაგრამ დასკვნითი წუთები მასპინძლების იყო და ‘ჯიქი’ 15:38 დამარცხდა.

მიუხედავად ამისა, მწვრთნელებმა შერკინების ხაზს ნდობა გამოუცხადეს და მხოლოდ შემკვრელი შეცვალეს - თამაშს ნიკა ჩიკვაძე იწყებს, ხოლო ნიკა სუხაშვილმა მარქაფაში გადაინაცვლა. სამაგიეროდ სრულად შეიცვალა ღერძი და 9 ნომერი დავით კლდიაშვილი, ხოლო მგეზავი დიტო კიკნაძე იქნება. ცენტრში გამოჩნდა დევი დევსურაშვილი, რომელიც გიორგი წიკლაურს შეუწყვილდება, თეიმურაზ ჭიჭინაძემ ფრთიდან ფულბეკად გადაინაცვლა, გარემარბი კი თორნიკე ვახანია იქნება.

თბილისის ‘აკადემიამ’ ‘ბათუმს’ უმასპინძლა და ერთადერთი, პრესტიჟის ლელო მატჩის მიწურულსღა გაიტანა, მაგრამ ამით საქმეს ვერ უშველა და 7:46 დამარცხდა.

მწვრთნელები ანგარიშით და თამაშის ხარისხით უკმაყოფილო დარჩნენ და სასტარტო შემადგენლობაში ცვლილებებს მიმართეს. სრულად შეიცვალა შერკინების პირველი ხაზი. ძირითადში დაწინაურდნენ გიორგი მოსულიშვილი და გიორგი გოგლიძე. თამაშს მგეზავად დაიწყებს დავით მოძღვრიშვილი, რომელიც ‘ბათუმთან’ ფულბეკი იყო, ხოლო 15 ნომრის პოზიციას სანდრო მარგიანი დაიკავებს. ცენტრში გიორგი მელაძეს მიშა ახობაძე შეუწყვილდება, ხოლო ფრთაზე გიორგი სვანიძეს ვიხილავთ.

rugby.ge