მომავალი სეზონიდან “ხაგუარესს” ახალი მწვრთნელი ეყოლება. ოფიციალურად დადასტურდა, რომ არგენტინულ ფრანჩიზს 2019 წლის სუპერ რაგბიში გონსალო ქუესადა გაწვრთნის.

44 წლის სპეციალისტი წარსულში არგენტინის ნაკრების მგეზავი იყო და 1996-2003 წლებში “პუმების” კვართით 38-ჯერ ითამაშა და 486 ქულა გაიტანა. სამწვრთნელო კარიერა კი 2008 წელს დაიწყო და 10 წლის განმავლობაში საფრანგეთში მუშაობდა: 2008-2011 წლებში საფრანგეთის ნაკრებში ერთ-ერთი ასისტენტი იყო, 2011-2012 წლებში “რასინგ 92”-ში მუშაობდა იგივე თანამდებობაზე, 2012-2013 წლებში კი მთავარი მწვრთნელი გახდა. გონსალო 2013-2017 წლებში “სტად ფრანსეს” ედგა სათავეში, ხოლო 2017 წლიდან “ბიარიცს” წვრთნიდა.

ქუესადა “ხაგუარესში” მარიო ლედესმას შეცვლის, რომელმაც ძალზე წარმატებით იმუშავა და არგენტინელები პლეი-ოფში პირველად გაიყვანა. ლედესმას კარგი შედეგები მალევე დაუფასდა და არგენტინის ნაკრების მთავარ მწვრთნელად დანიშნეს. იყო საუბარი, რომ არგენტინელები იაპონელებს მიბაძავდნენ და საკლუბო დონეზეც ლედესმა იმუშავებდა, როგორც ეს “სანვულვზში” და იაპონიის ნაკრებში ხდება, რომელთა მთავარი მწვრთნელიც ჯეიმი ჯოზეფია. თუმცა, ასე არ მოხდა და “ხაგუარესს” ახალი მწვრთნელი ეყოლება.