საერთაშორისო

21:20 | 1.08.2018 | ნანახია 2619 - ჯერ

არგენტინის ნაკრები ლედესმამ ჩაიბარა

არგენტინის ნაკრებს მარიო ლედესმა გაწვრთნის. აღნიშნული ინფორმაცია არგენტინის რაგბის კავშირის ოფიციალურმა ვებგვერდმა გაავრცელა.

“პუმებმა” გასულ თვეში სამივე საშინაო ტესტ-მატჩი უშანსოდ დათმეს, რასაც დანიელ ურკადეს დათხოვნა მოჰყვა, რომელიც არგენტინის ნაკრების სათავეში 5 წელი იმყოფებოდა და 2015 წლის მსოფლიო თასზე მე-4 ადგილსაც უწია, თუმცა მას შემდგომ არგენტინელებმა 21 შეხვედრა ჩაატარეს, საიდანაც მხოლოდ 3 მოიგეს და ბუნებრივია, რომ ეს ყველაფერი ურკადეს გაშვებით დასრულდა.

45 წლის ლედესმასთვის “პუმებში” მუშაობა სიახლე არ უნდა იყოს, რადგან ის 2018 წლის სუპერ რაგბში “ხაგუარესს” წვრთნიდა, რომელიც ფაქტობრივად იგივე არგენტინის ნაკრებია, ოღონდ საკლუბო ტურნირზე (ვგულისხმობთ იმას, რომ არგენტინის ნაკრებში მხოლოდ “ხაგუარესში” მოთამაშე მორაგბეებს იძახებენ). ლედესმამ “ხაგუარესში” ისტორიულ წარმატებას მიაღწია და არგენტინული ფრანჩიზი პირველად გაიყვანა სუპერ რაგბის 1/4 ფინალში.

ჯერჯერობით უცნობია, დარჩება ლედესმა “ხაგუარესში” და ერთდროულად გაუძღვება არგენტინულ კლუბს და ნაკრებს, (როგორც ამას იაპონიაში ჯეიმი ჯოზეფი აკეთებს, რომელიც “სანვულვზის” და იაპონიის ნაკრების მთავარი მწვრთნელია), თუ მხოლოდ ნაკრებში იმუშავებს და “ხაგუარესს” ახალი მწვრთნელი ეყოლება.

აქვე გეტყვით, რომ არგენტინის ნაკრების ყოფილი კვაჭი (84 მატჩი, 3 ლელო) 2011-2012 წლებში “სტად ფრანსეს” შერკინების მწვრთნელი გახლდათ, შემდეგ იგივე თანამდებობაზე ორი სეზონი “მონპელიეში” მუშაობდა, 2015 წელს ავსტრალიურ “ვორათასში” იმუშავა, ხოლო 2015-2017 წლებში ავსტრალიის ნაკრების შერკინების მწვრთნელი იყო.


კომენტარები (0)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
0.078334