2018 წლის 20-წლამდელთა მსოფლიო თასი ომახიანად დავიწყეთ. უძლიერეს სამხრეთ აფრიკის ნაკრებს შევერკინეთ და ძალიან ცოტა დაგვაკლდა, რომ პირველივე სათამაშო დღეს ხმაურიანი სენსაცია დაგვეფიქსირებინა.

“ქურციკებს” მოსამზადებელ პერიოდში გასვლაზე ორჯერ ვეთამაშეთ და ორივე შემთხვევაში აფრიკელებმა იმარჯვეს, რომელთაგან განსაკუთრებით დამაჯერებლად პირველ თამაშში მოიგეს 55:11, ხოლო მეორე თამაშში ქართველებმა შედარებით უკეთესად ითამაშეს და სხვაობა შევამცირეთ – 23:48. მოკლედ, მეტოქეს ძალიან კარგად ვიცნობდით და ნაკრების თითოეულმა წევრმა მშვენივრად იცოდა, თუ რა დონის გუნდის წინააღმდეგ უწევდა თამაში. მათ რიგებში ირჯება “სტორმერსის” ძირითადი მგეზავი დამიან უილემსი, რითაც ყველაფერია ნათქვამი.

მიუხედავად მოწინააღმდეგის ასეთი ძალისა, უმცროსმა “ბორჯღალოსნებმა” გმირულად იომეს, ბონუს-ქულა მოიპოვეს, ბოლო წამებამდე მოსაგებად იბრძოდნენ და ნათლად დაგვანახეს, თუ რა მაგარი თაობა მოსდის საქართველოს.

პირველი ქულები “ქურციკებმა” მოიპოვეს, მე-10 წუთზე წინ თამაშის გამო აფრიკელთა შერკინება დაინიშნა, რომლიდანაც ბურთი გამოიტანეს და საბოლოოდ მარცხენა ფრთიდან მოახერხეს ჩვენი დაცვის გარღვევა, ტაირონ გრინმა მაღალი სისწრაფით გაირბინა და შემდეგ ბურთი მშვენივრად გაატანა უანდისილე სიმელანეს, რომელმაც ლელოში დაამიწა, ხოლო გარდასახვა ზემოხსენებულმა უილემსმა ააცილა.

ქართველებმა ბრჭყალები ორიოდე წუთში გამოაჩინეს: ლაშა ლომიძემ ხაზი გაჭრა და ბურთი სანდრო სვანიძეს გაატანა, რომელიც ლელოდან ოთხ მეტრშიღა გააჩერეს, თუმცა შეტევა გაგრძელდა, ჯარიმის უპირატესობაც მოვიპოვეთ, თედო აბჟანდაძემაც ამით ისარგებლა და ლელოში ფეხით შეაცურა ბურთი, ლაშა ლომიძე კი მას მიჰყვა და ბურთი დაამიწა, გელა აფრასიძემ გარდასახვა ზუსტად შეასრულა და დავწინაურდით. სამ წუთში კი შერკინებამ ივარგა, მეტოქე დავაჯარიმეთ, ხოლო აფრასიძემ კარში დაარტყა და კიდევ 3 ქულა მოგვიპოვა.

ამ თამაშში “ბორჯღალოსნების” აქილევსის ქუსლი რაქებში თამაში იყო, სადაც მეტოქე ბევრად გვჯობდა: გვინელებდა შეტევებს, გვაჯარიმებდა და ისეთ მომენტებში გვიღლიტავდა ბურთს, როდესაც ძალიან კარგი შესატევი პლაცდარმი გვქონდა. სწორედ ამ სათამაშო კომპონენტის გაუმჯობესებაზე უნდა იმუშავოს სამწვრთნელო შტაბმა და ამ შემთხვევაში კიდევ უფრო წინ წავალთ.

26-ე წუთზე კი აშკარა შეცდომა დავუშვით და ლელოთი დავისაჯეთ: აფრიკელებმა ჩვენს 5-იანთან აუტი მოაწოდეს და შემდეგ მოლი ჩამოაყალიბეს, რომელშიც არ შევედით იმის იმედით, რომ ბლოკი დაფიქსირდებოდა, თუმცა ამის შესრულება არ მოხერხდა და ლელო ძალიან იოლად დაიდო, რომელიც ამჯერად უილემსმა გარდასახა. ტაიმი მაინც ჩვენი გამარჯვებით დასრულდა: დემურ თაფლაძემ 38-ე წუთზე 22-თან მეტოქეს ბურთი ჩაუჭრა და ძელებს შორის დაამიწა, აფრასიძემ კი გარდასახა და ტაიმი 17:12 მოვიგეთ.

მეორე ნახევარი ქართველთათვის ძალიან ცუდად დაიწყო, 3 გარდასახული ლელო გავუშვით, რომელთაგან განსაკუთრებით დასანანი პირველი ლელო იყო, როდესაც მამუკაშვილს ბურთი დაუფარეს და მაშინვე ლელოში დაამიწეს ოვალი. ამას აფრასიძემ ჯარიმით უპასუხა და მე-60 წუთისთვის ანგარიში 20:33 იყო.

“ბორჯღალოსნებმა” მაინც ივარგეს: 70-ე წუთზე აფრიკელებს ბურჯი გაუსინბინეს და მატჩის ბოლომდე 14 იყვნენ, რითაც ქართველებმა უმალ ისარგებლეს და 71-ე წუთზე შეცვლაზე შემოსულმა ლუკა დვალიშვილმა მეტოქე მესამედ დაალელოვა, აბჟანდაძემ გარდასახა და მოსაგებად ერთი გარდასახული ლელო გვჭირდებოდა, თუმცა რიცხობრივი უმცირესობის მიუხედავად “ქურციკებმა” ძალიან კარგად ითამაშეს, საქართველოს ნაკრებს შეტევის შესაძლებლობა აღარ მისცეს და თამაში გამარჯვებამდე მიიყვანეს, ხოლო ქართველებს ბონუსი ერგოთ – 27:33.

მიუხედავად იმისა, რომ შეცდომები ნამდვილად გვქონდა და განსაკუთრებით ეს რაქებში თამაშს ეხება, თამამად შეგვიძლია ვთქვათ: ეს იყო გმირული დასაწყისი! ბრავო ბიჭებს! მათ ყველაფერი ბოლომდე გაიღეს და ელემენტარული შეცდომები რომ არა, შესაძლოა, საერთოდ სენსაციური შედეგი დაგვეფიქსირებინა. თუმცა, ეს შეცდომები თამაშის ნაწილია, ხოლო მის გამოსწორებაზე მწვრთნელებმა უნდა იზრუნონ და დარწმუნებულები ვართ, რომ ილია მაისურაძე და მისი შტაბი ამაზე მაქსიმალურად იმუშავებს. ამ შედეგით კი ალბათ მთელმა საქართველომ უნდა იამაყოს და იმედი გვაქვს, რომ 3 ივნისს საფრანგეთთან თამაშის შემდეგაც ასე შევაქებთ ჩვენს ნაკრებს.

ჯგუფის მეორე მატჩში საფრანგეთის ნაკრებმა ირლანდია დაძაბულ ბრძოლაში დაამარცხა.

სატურნირო ცხრილი