16 ივნისს საქართველოს ნაკრები ძალებს ფიჯის უძლიერეს შემადგენლობასთან მოსინჯავს. კუნძულელებმა 2018 წლის წყნარი ოკეანის თასისთვის გაფართოებული შემადგენლობა გამოაცხადეს და ყველა საუკეთესოს უხმეს.

განსაკუთრებით მრისხანეს ფიჯელთა გარემარბები გამოიყურებიან - ვერენიკი გონევა, ჟოსუა ტუისოვა, ნემანი ნადოლო და ტიმოსი ნაგუსა.

მასპინძლებს ტრავმების გამო ტევიტა კავუბატი, პესელი იატო და ლევანი ბოტია დააკლდებათ.

საქართველოს ნაკრები კუნძულზე ორი წლის განმავლობაში მეორედ ჩადის, თუმცა პირველად ითამაშებს წყნარი ოკეანის თასზე. 2016 წლის ზაფხულის ტესტებზე სამოას ფრედ ვეთამაშეთ (19:19), ტონგას 23:20 ვძლიეთ, ხოლო ფიჯი 14:3 დავამარცხეთ, თუმცა, მაშინ მეტოქეებს ჩვენს წინააღმდეგ უძლიერესი შემადგენლობით არ უთამაშიათ.

მანამდე ფიჯის 2012 წელს „მიხეილ მესხზე“ ვუმასპინძლეთ და 19:24 დავმარცხდით.

სუვაში გამგზავრებამდე ბორჯღალოსნები 31 მაისს თბილისში, „დინამო არენაზე“ „ფრანგ ბარბაროსებს“ უმასპინძლებენ, რომელიც პრო დ2-ის ნაკრებით მოდის, ხოლო წყნარი ოკეანის თასის ეგიდით, 9 ივნისს ქართველები ჯერ ტონგას შეხვდებიან, ხოლო 16-ში - მასპინძელ ფიჯის. ტურნირის მეოთხე მონაწილე სამოაა, თუმცა, მას კუნძულებზე არ ვხვდებით და ჩემპიონიც ორი ტურის ჯამში გამოვლინდება.

შინ დაბრუნებამდე საქართველოს ნაკრები იაპონიაში შეივლის და 23 ივნისს იაპონიის ნაკრებს შეხვდება.

ფიჯის გაფართოებული შემადგენლობა:

ბურჯები: კამპესე მა’აფუ (ილინგი, ინგლისი), პენი რავაი (ბორდო, საფრანგეთი), ერონი მავი (დრუა, ფიჯი), როპატე რინაკამა (ნორთლენდი, ახალი ზელანდია), კალივატი ტავაკე (ვორათაზი, ავსტრალია), მანასა საულო (ლონდონ აირიში, ინგლისი);

კვაჭები: ტალემაიოტოგა ტუაპატი (პროვანსი, საფრანგეთი), რატუნაისა ნავუმა, ტუვერე ვერემალუა (ორივე - დრუა, ფიჯი);

მეორე ხაზი: სიკელი ნაბუ (ბიარიცი, საფრანგეთი), ლეონე ნაკარავა (რასინგი, საფრანგეთი), აპი რატუიანირავა (ნორთჰემპტონი, ინგლისი), ალბერტუ ტუისუე (სიდნეი რემსი, ავსტრალია);

მესამე ხაზი: დომინიკო ვაკანიბუროტუ (ბრივი, საფრანგეთი), ვილიამე მატა (ედინბურგი, შოტლანდია), მოსესე ვოკა (დრუა, ფიჯი), ნემანი ნაგუსა (ორიაკი, საფრანგეთი), აკაპუსი ქერა (აჟენი, საფრანგეთი);

9: ჰენრი სენილოლი (ტიმიშოარა-სარასენსი, რუმინეთი), ფრენკ ლომანი, სერუპეპელი ვულარიკა (ორივე - დრუა, ფიჯი);

10: ბენ ვოლავოლა (ბორდო, საფრანგეთი);

გარემარბები: ვერენიკი გონევა (ნიუკასლი, ინგლისი), ჟოსუა ტუისოვა (ტულონი, საფრანგეთი), ნემანი ნადოლო, ტიმოსი ნაგუსა (ორივე - მონპელიე, საფრანგეთი);

ცენტრები: იალე ვატუბუა (პო, საფრანგეთი), სევანაია გალალა (ბრივი, საფრანგეთი), სემი რადრადრა (ტულონი, საფრანგეთი);

ფულბეკი: კინი მურუმურივალუ (ლა როშელი, საფრანგეთი).