ერთი თვის წინ ჩვენს საიტზე გამოქვეყნდა ინფორმაცია, რომ ბურჯმა ირაკლი მირცხულავამ პრო დ2-ის „კოლომიესთან“ 3-წლიანი ხელშეკრულება დადო და მომავალი სეზონიდან ამ კლუბის ღირსებას დაიცავს.

მაგრამ ახლახან, ერთ-ერთ ფრანგულ გამოცემაში - "ლა დეპეშში" - გავრცელდა ცნობა, რომ 29 წლის ქართველის ამჟამინდელმა კლუბმა, ტოპ 14-ში დარჩენისთვის მებრძოლმა "ოიონამ", ირაკლის დატოვება გადაწყვიტა და მასთან ჯერაც მოქმედ კონტრაქტში ის ოპცია აამოქმედა, რომელიც უფლებას აძლევდა, სურვილის შემთხვევაში მირცხულავასთან კონტრაქტი გაეხანგრძლივებინა.

ეს კი იმას ნიშნავს, რომ ირაკლი მირცხულავა მომავალ სეზონშიც "ოიონაში" იქნება, ოღონდაც ამ ეტაპზე არაა ცნობილი - ტოპ 14-ში თუ პრო დ2-ში. დღესდღეობით "ოიონა" ტოპ 14-ის ცხრილის ბოლოსწინა ადგილზეა და ლიგაში დარჩენისთვის იბრძვის. აქ მისი კონკურენტები "ბრივი", "სტად ფრანსე" და "აჟენი" არიან.

ირაკლი მირცხულავას აქტივში 11 სანაკრებო კეპია. მისი დებიუტი ბორჯღალოსნებში 2012 წელს, უკრაინის ნაკრებთან მატჩში შედგა, ხოლო ბოლოს მირცხულავამ სანაკრებო კვართი 2016-ში, ზაფხულის ტესტებზე ფიჯისთან სტუმრად 14:3 მოგებულ მატჩში მოირგო. ტოპ 14-ის მიმდინარე ჩემპიონატის 24 მატჩიდან მან 12-ში მიიღო მონაწილეობა და 12-ვე შემთხვევაში სასტარტო შემადგენლობაში იყო, ხოლო შემოდგომაზე ჩელენჯ კაპის 4 მატჩში (3 სასტარტოში) მიიღო მონაწილეობა.