„მსოფლიო რაგბის“ გადაწყვეტილებით, საქართველოსა და რუმინეთის ნაკრებების მიერ ფიჯიზე გასამართ ტესტ-მატჩებს სტატუსი მიენიჭა, ისინი ფიჯისა და ტონგასთან ერთად „წყნარი ოკეანის თასისთვის“ იბრძოლებენ.

„წყნარი ოკეანის თასი“ 2006 წლიდან იმართება და მისი მუდმივი მონაწილეები სამოა, ფიჯი და ტონგა იყვნენ. 2015 წლის ჩათვლით, მისი მუდმივი მონაწილე იყო იაპონია, თუმცა აგერ უკვე მესამე წელია, ივნისში ამ ტურნირის ნაცვლად მაღალი დონის ტესტ-მატჩებს ატარებს.

სხვადასხვა დროს ტურნირში „ჯუნიორ ოლ ბლექსი“, „მაორი ოლ ბლექსი“, ავსტრალიის „ა“ ნაკრები, აშშ-სა და კანადის ეროვნული ნაკრებები მონაწილეობდნენ. „წყნარი ოკეანის თასი“ ყველაზე ბევრჯერ - 4-ჯერ ფიჯის აქვს მოგებული, აქედან სამი 2015-2017 წლებში. სამ-სამჯერ იყვნენ პირველები სამოა და „ჯუნიორ ოლ ბლექსი“, ორჯერ იაპონია და ერთხელ „მაორები“.

რადგან ამა წლის ივნისში სამოას 2019 წლის მსოფლიო თასის შესარჩევი მატჩები აქვს გასამართი, ის პირველად გამოაკლდა „წყნარი ოკეანის თასს“. სამაგიეროდ, ტურნირში პირველად ჩაერთვება ორი ევროპული ნაკრები - საქართველო და რუმინეთი. ტურნირი ორ ტურად ჩატარდება, საქართველო რუმინეთს, ხოლო ფიჯი ტონგას არ ეთამაშება.

გამარჯვებული გუნდი 4 ქულას მიიღებს, ფრეზე 2 ქულაა, 7 და ნაკლები ქულით მარცხი, ან მატჩში 4 და მეტი ლელოს გატანა თითო-თითო ბონუს-ქულად ფასობს. ამ სისტემით დაითვლება ქულები, 4 მატჩის შედეგად შედგება სატურნირო ცხრილი და პირველ ადგილზე გასული ნაკრები თასს ჩაიბარებს.

თამაშები სუვაში გაიმართება და 9 ივნისს საქართველო ტონგას, ხოლო ფიჯი რუმინეთს ეთამაშება. 16 ივნისს მეორე ტურია და ტონგა რუმინთს, ხოლო საქართველო ფიჯის შეხვდება.